ஆரணி பேரூராட்சியில் அரசு பள்ளி மாணவர்களுக்கு இலவச லேப்டாப், சைக்கிள்

ஊத்துக்கோட்டை: ஆரணி பேரூராட்சியில் உள்ள ஆண்கள், பெண்கள் மேல்நிலைப்பள்ளியில் லேப்டாப் வழங்கும் நிகழ்ச்சி நேற்று நடந்தது. தலைமை ஆசிரியர்கள் எத்திராஜூலு, பரமசிவம் தலைமை தாங்கினர். பேரூராட்சி தலைவர் வெங்கடேசன், துணைத் தலைவர் கிருஷ்ணன், அதிமுக நகர செயலாளர் தயாளன் முன்னிலை வகித்தனர். சிறப்பு அழைப்பாளராக கலந்துகொண்ட பொன்.ராஜா எம்எல்ஏ, சோழவரம் ஒன்றியக்குழு தலைவர் கார்மேகம் ஆகியோர் மாணவர்கள் 127 பேருக்கும் மாணவிகள் 169 பேருக்கும் லேப்டாப் வழங்கி பேசினர். துணை தலைமை ஆசிரியர் ஜார்ஜ், ஆசிரியர்கள் முத்துக்குமரன், முனிகிருஷ்ணன் உள்ளிட்ட பலர் கலந்துகொண்டனர். 

கன்னிகைப்பேர் அரசு மேல்நிலைப்பள்ளியில் நடந்த விழாவுக்கு தலைமை ஆசிரியர் அருள்மொழி தலைமை தாங்கினார். ஒன்றியக்குழு தலைவர் அம்மினி மகேந்திரன், மாவட்ட கவுன்சிலர் சந்திரன், ஒன்றிய கவுன்சிலர் விஜயகுமார், பெற்றோர்ஆசிரியர் கழக நிர்வாகி பழனி, முன்னாள் ஊராட்சி தலைவர் சுந்தரேசன் ஆகியோர் முன்னிலை வகித்தனர். துணை தலைமை ஆசிரியர் கவிதா ராணி வரவேற்றார். சிறப்பு அழைப்பாளராக பங்கேற்ற மாவட்ட ஊராட்சி குழு தலைவர் ரவிச்சந்திரன் 144 பேருக்கு லேப்டாப், 95 பேருக்கு சைக்கிள்களை வழங்கினார்.

நன்றி -தமிழ்முரசு -07.11.2012

போலீஸ்காரர்கள் பற்றாக்குறையால் திருவள்ளூர் மாவட்டத்தில் தினமும் வழிப்பறி, கொள்ளை

திருவள்ளூர்: திருவள்ளூர் மாவட்டத்தில் உள்ள காவல் நிலையங்களில் போலீஸ்காரர்கள் பற்றாக்குறை இருப்பதால் தினமும் கொள்ளை, வழிப்பறி சம்பவங்கள் நடந்து வருகிறது. திருவள்ளூர் காவல் மாவட்டத்தில் உள்ள திருத்தணி, திருவள்ளூர், ஊத்துக்கோட்டை,  பூண்டி, பொன்னேரி ஆகிய இடங்களில் டிஎஸ்பி அலுவலகம் உள்ளது. பள்ளிப்பட்டு, ஆர்.கே.பேட்டை, பொதட்டூர்பேட்டை, திருத்தணி, கனகம்மாசத்திரம், திருவாலங்காடு, திருவள்ளூர் நகரம், திருவள்ளூர் தாலுகா, புல்லரம்பாக்கம், கடம்பத்தூர், மப்பேடு, செவ்வாப்பேட்டை, வெள்ளவேடு, பென்னலூர் பேட்டை, ஊத்துக்கோட்டை, வெங்கல், பெரியபாளையம், பாதிரிவேடு, பொன்னேரி, திருப்பாலைவனம், மீஞ்சூர் காட்டூர், சோழவரம், ஆரணி, கும்மிடிப்பூண்டி, ஆரம்பாக்கம், சிப்காட், கவரைப்பேட்டை ஆகிய 29 காவல்நிலையங்கள் உள்ளன. 

இந்த காவல்நிலையங்கள் தொடங்கப்பட்டு கிட்டத்தட்ட 30 வருடங்களுக்கு மேல் ஆகிவிட் டது. அப்போது ஒரு காவல் நிலையத்தில் 60 முதல் 90 போலீஸ்காரர்கள் இருந்தனர். தற்போது மக்கள் தொகை அதிகரித்துவிட்டது. ஆனால் அதற்கு தகுந்தாற்போல் போலீஸ்காரர்கள் கிடையாது. பெரும்பாலான காவல்நிலையத்தில் 30 போலீஸ்காரர்களே உள்ளனர். திருவள்ளூர், திருத்தணி, கும்மிடிப்பூண்டியில் ஒரு நெடுஞ்சாலை ரோந்து வாகனமும் திருவள்ளூர், திருத்தணியில் நகர ரோந்து வாகனமும் உள்ளது. இதனால் மாவட்டத்தில் அதிகரித்துள்ள வழிப்பறி, கொள்ளை தடுக்க முடியாமல் போலீசார் திணறுகின்றனர். மாவட்டத்தில் கொள்ளை, வழிப்பறி நடக்காத நாட்களே கிடையாது. இதனால் பீதியில் உள்ள மக்கள், ‘காவல்நிலையத்தில் போலீஸ்காரர்கள் பற்றாக்குறையை நீக்க நடவடிக்கை எடுக்க வேண்டும் என்று கோரிக்கை வைத்துள்ளனர்.

நன்றி -தமிழ்முரசு -07 .11.2012

ஊத்துக்கோட்டை-திருவள்ளூர் சாலையில் அரசு பள்ளி கட்டிடம் திறக்கப்படுமா?

ஊத்துக்கோட்டை: திருவள்ளூர் மாவட்டம் ஊத்துக்கோட்டை-திருவள்ளூர் சாலையில் உள்ள அரசு ஆண்கள் மேல்நிலைப்பள்ளியில் 1200 மாணவர்கள் படித்து வருகின்றனர். ஊத்துக்கோட்டை, தாராட்சி, பாலவாக்கம், மாம்பாக்கம், வேலக்காபுரம், பிளேஷ்பாளையம் உள்ளிட்ட பகுதிகளில் இருந்து மாணவர்கள் வந்து படித்து செல்கின்றனர். இந்த பள்ளிக்கு 1960ம் ஆண்டு எம்ஜிஆர் தனது சொந்த பணத்தில் கட்டிடம் கட்டிக்கொடுத்துள்ளார். இந்த கட்டிடம் பழுதடைந்ததால் 2002ம் வருடம் சிறுசேமிப்பு நிதியில் இருந்து ரூ.4.90 லட்சம் செலவில் கட்டிடத்தை சீரமைத்தனர். 

இதன்பிறகு சில வருடங்களில் கட்டிடம் பழுதானதால் புதுப்பிக்க முடியாத நிலைமை ஏற்பட்டது. இதையடுத்து, பழைய கட்டிடத்தை இடித்துவிட்டு புதிய கட்டிடம் கட்டவேண்டும் என்று பெற்றோர்கள் கோரிக்கை வைத்தனர். இதனால், அனைவ ருக்கும் கல்வி திட்டத்தின் கீழ் 28 லட்ச ரூபாய் செலவில் புதிய கட்டிடம் கட்டப்பட்டது. ஆனால் இதுவரை திறப்பு விழா நடத்தவில்லை. இதனால் பழைய கட்டிடத்தில் மாணவர்கள் விளையாடுகின்றனர். எனவே, பழைய கட்டிடத்தை இடித்துவிட்டு புதிய கட்டிடத்தை திறக்கவேண்டும் என்று பெற்றோர் ஆசிரியர் கழக நிர்வாகிகளும் மாணவர்களும் பெற்றோர்களும் கோரிக்கை விடுத்துள்ளனர்.

நன்றி -தமிழ்முரசு -30.10.2012