கிருஷ்ணா நதி நீர் தமிழக எல்லையை வந்தடைந்தது.- பூண்டி ஏரியில் நீர் தேக்கத்தின் அளவு உயர்வு..

கண்டலேறு அனையில் இருந்து திறந்து விடப்பட்ட கிருஷ்ணா நதி நீர் நேற்று காலை தமிழக எல்லையை வந்தடைந்தது.

கிருஷ்ணா நதி நீர்

கிருஷ்ணா நதி நீர் பங்கீட்டு திட்டத்தின்படி ஆந்திர அரசு ஆண்டுதோறும் 12 டி.எம்.சி. தண்ணீரை தமிழ்நாட்டுக்கு திறந்து விட வேண்டும். ஜனவரி மாதம் முதல் ஏப்ரல் மாதம் வரை 8 டி.எம்.சி. தண்ணீரும், ஜூலை மாதம் முதல் அக்டோபர் மாதம் வரை 4 டி.எம்.சி. தண்ணீரையும் பூண்டி ஏரிக்கு திறந்து விடவேண்டும். அதன்படி கண்டலேறு அணையில் இருந்து கிருஷ்ணா நதி கால்வாயில் ஜனவரி மாதம் 13-ந் தேதி பூண்டி ஏரிக்கு தண்ணீர் திறந்து விட்டனர். கண்டலேறு அணையில் நீர்மட்டம் குறைந்ததால் கடந்த 5-ந் தேதி பூண்டி ஏரிக்கு தண்ணீர் திறந்து விடுவது நிறுத்தப்பட்டது. இதனால் பூண்டி ஏரியில் நீர் மட்டம் வெகுவாக குறைந்தது.

இதனால் சென்னையில் கடும் குடிநீர் தட்டுப்பாடு ஏற்படும் அபாயம் ஏற்பட்டது. இதை கருத்தில் கொண்டு தமிழக பொதுப்பணித்துறை அதிகாரிகள் ஆந்திர மாநில பொதுப் பணித்துறை அதிகாரிகளை தொடர்பு கொண்டு கண்டலேறு அணையில் இருந்து மீண்டும் தண்ணீர் திறந்து விடும்படி கேட்டு கொண்டனர்.

தமிழக எல்லையை வந்தடைந்தது

அதன்படி கடந்த 26- ந் தேதி மாலை கண்டலேறு அணையில் இருந்து கிருஷ்ணா நதி கால்வாயில் தண்ணீர் திறந்து விட்டனர். முதலில் வினாடிக்கு 200 கனஅடி வீதம் திறந்து விட்டனர். பின்னர் படிப்படியாக அதிகரித்தனர். தற்போது வினாடிக்கு 600 கனஅடி வீதம் திறக்கப்படுகிறது. தமிழக எல்லையான ஊத்துக்கோட்டை அருகே உள்ள தாமரைகுப்பம் ஜீரோ பாயிண்டிற்கு நேற்று காலை 6 மணிக்கு கிருஷ்ணா நதி நீர் வந்தடைந்தது. வினாடிக்கு 30 கனஅடி விதம் வந்து கொண்டிருந்தது. இங்கிருந்து 25 கிலோ மீட்டர் தூரத்தில் உள்ள பூண்டி நீர் தேக்கத்துக்கு இன்று காலை போய் சேரும் என்று எதிர்பார்க்கப்படுகிறது. பூண்டி ஏரியின் உயரம் 35 அடி. 3231 மில்லியன் கனஅடி தண்ணீரை சேமித்து வைக்கலாம்.

நேற்று மதியம் 12 மணிக்கு பூண்டி ஏரியில் 17.80 அடி நீர் மட்டம் பதிவானது. வெறும் 100 மில்லியன் கனஅடி நீர் மட்டும்தான் இருப்பு உள்ளது. தற்போது கண்டலேறு அணையிலிருந்து தண்ணீர் திறக்கப்பட்டுள்ளதால் பூண்டி ஏரியின் நீர்மட்டம் உயந்துள்ளது...

பூண்டி ஏரியில் மீன்கள் செத்து மிதப்பதால் பரபரப்பு ....

பூண்டி ஏரி

திருவள்ளூர் மாவட்டம் பூண்டியில் சத்திய மூர்த்தி நீர் தேக்கம் உள்ளது. இங்கு சேமித்து வைக்கப்படும் தண்ணீரை கொண்டுதான் சென்னை மக்களின் குடிநீர் ஸீதவை நிறைவேற்றப்படுகிறது. பூண்டி ஏரியில் மத்திய அரசின் கிராமிய மீன் வளர்ச்சி மேம்பபாட்டு திட்டத்தின் கீழ் உள்ளூர் மீனவர்கள் பயன்பெற மானியத்துடன் ரூ.3¼ கோடி செலவில் கடந்த 2012–ம் ஆண்டு நவம்பர் மாதம் 64 பிளாஸ்டிக் மிதவைகளை பயன்படுத்தி மீன் குஞ்சுகள் வளர்த்து வந்தனர்.

இந்த நிலையில் ஆந்திராவில் உள்ள கண்டலேறு அணையில் இருந்து பூண்டி ஏரிக்கு தண்ணீர் திறந்து விடுவது கடந்த 10–ந் தேதி முதல் நிறுத்தப்பட்டது.

செத்து மிதக்கும் மீன்கள்

இதனால் பூண்டி ஏரியில் நீர் மட்டம் வெகுவாக குறைந்து வருகிறது. மேலும் ஏரியில் ஒரு பகுதி வறண்டு விட்டது. இந்த நிலையில் ஏரியில் நேற்று ரூ. 5 லட்சம் மதிப்புள்ள மீன்கள் செத்து மிதந்தன. தண்ணீர் மட்டம் குறைந்ததால் மீன்கள் இறந்ததா? அல்லது எதாவது நோய் தாக்கி இறந்ததா? என்று தெரியவில்லை. இதனால் அங்கு பரபரப்பு ஏற்பட்டுள்ளது. மானிய கடன் வாங்கி மீன் வளர்ப்பில் ஈடுபட்ட மீனவர்கள் செய்வது தெரியாமல் திகைப்படைந்துள்ளனர்.

மேலும் மீன்கள் செத்து மிதப்பதால் ஏரியின் அழகை ரசிக்க வரும் சுற்றுலா பயணிகள் துர்நாற்றத்தால் முகம் சுழித்து செல்கின்றனர். மீன்கள் செத்து மிதப்பதால் பெருத்த நஷ்டம் அடைந்த தங்களுக்கு தமிழக அரசு நிவாரண தொகை வழங்க முன் வரவேண்டும் என்று மீனவர்கள் கோரிக்கை விடுத்துள்ளனர்.

நாய் சாலையின் குறுக்கே ஓடியதால் மோட்டார் சைக்கிளில் இருந்து விழுந்து பெண் பலியானார். மற்றொருவர் காயம் அடைந்தார்.

நாய் சாலையின் குறுக்கே ஓடியதால் மோட்டார் சைக்கிளில் இருந்து விழுந்து பெண் பலியானார். மற்றொருவர் காயம் அடைந்தார்.

விபத்து

ஊத்துக்கோட்டை அருகே உள்ள கொல்லபாளையம் கிராமத்தை சேர்ந்தவர் நரசய்யா. இவரது மனைவி ராஜம்மாள் (வயது 62). இவர் தன்னுடைய பேரன் பிரசாத் (22) உடன் மோட்டார் சைக்கிளில் திருவள்ளூருக்கு சென்றார். அங்கு உறவினர்களை சந்தித்த பின் ஊருக்கு புறப்பட்டார். பிரசாத் மோட்டார் சைக்கிளை ஓட்டினர். ராஜம்மாள் பின்னால் அமர்ந்திருந்தார்.

பூண்டி கூட்டு சாலையில் சென்று கொண்டிருந்த போது சாலையின் குருக்கே நாய் ஒன்று திடீர் என்று ஓடியது. இதனால் நிலை தடுமாறி கீழே விழுந்த 2 பேரும் படுகாயம் அடைந்தனர்.

பெண் பலி

இவர்களை அந்த வழியாக சென்றவர்கள் மீட்டு சிகிச்சைக்காக திருவள்ளூர் அரசு ஆஸ்பத்திரியில் அனுமதித்தனர். பின்னர் ராஜம்மாளை மேல் சிகிச்சைக்காக சென்னை அரசு ஆஸ்பத்த்ரியில் அனுமதித்தனர். அங்கு சிகிச்சை பலனின்றி அவர் உயிரிழந்தார்.

இது குறித்து பென்னாலு£ர்பேட்டை இன்ஸ்பெக்டர் முத்துராமலிங்கம் வழக்குப்பதிவு செய்து விசாரணை நடத்தி வருகிறார்.
 

பூமி பூஜை போடும் இடத்திற்கு தேர்தல் பார்வையாளர்கள் திடீரென வந்ததால், அமைச்சர்கள், காரில் ஏறி பறந்தனர்

ஊத்துக்கோட்டை: 

ஜெயலலிதா வருகையை ஒட்டி, பூமி பூஜை போடும் இடத்திற்கு தேர்தல் பார்வையாளர்கள் திடீரென வந்ததால், அமைச்சர்கள், காரில் ஏறி பறந்தனர். திருவள்ளூர் தொகுதி வேட்பாளர் வேணுகோபாலை ஆதரித்து, வரும், 8ம் தேதி, பெரியபாளையம் அடுத்த வடமதுரை கிராமத்தில், பிரசாரம் செய்ய உள்ளார். அமாவாசை நாளான, நேற்று முன்தினம் மாலை, பொதுக்கூட்டம் நடக்கும் இடத்திற்கு, பூமி பூஜை போடும் நிகழ்ச்சி நடந்தது.

அமைச்சர்கள் ஓ.பன்னீர்செல்வம், ரமணா, மூர்த்தி, அப்துல்ரஹீம், எம்.எல்.ஏ.,க்கள் பொன்.ராஜா, மணிமாறன் மற்றும் மாவட்ட ஊராட்சிக்குழு தலைவர் ரவிச்சந்திரன் மற்றும் கட்சி பிரமுகர்கள் இருந்தனர். அமைச்சர்கள் வந்ததால், எல்லாபுரத்தில் உள்ள முக்கிய பிரமுகர்கள் தங்களது வாகனங்களில் குவிந்தனர். அப்போது, தொகுதி தேர்தல் பார்வையாளர்கள் அகிலேந்திர பிரதாப் யாதவ், அஜய்தேகோ ஆகியோர், காரில், பெரியபாளையம் வழியாக திருவள்ளூர்சென்றனர். 

வடமதுரை சென்றபோது, மைதானத்தின் ஒரு பகுதியில் அ.தி.மு.க., கட்சிக் கொடிகள் மற்றும் வாகனங்கள் அதிகமாக இருந்தததை கண்ட அதிகாரிகள், அந்த இடத்திற்குச் சென்றனர். அதிகாரிகள் வருவதை கண்ட அமைச்சர்கள், ஒருவர் பின் ஒருவராக காரில் ஏறி பறந்தனர். அங்கு சென்ற அதிகாரிகள், எம்.எல்.ஏ.,க்கள் மற்றும் முக்கிய பிரமுகர்களின் வாகனங்களை தீவிரமாக சோதனை செய்தனர். அதிகாரிகள் சென்றவுடன், பொதுக்கூட்ட மேடை அமைக்க, பூமி பூஜை போடப்பட்டது.

5 கோடி சில்லரை காசுகள் - 7 சரக்கு பெட்டிகள்- தேர்தல் ஆணையம் சுற்றி வளைப்பு..

5 கோடி சில்லரை- 7 சரக்கு பெட்டிகள்- தேர்தல் ஆணையம் சுற்றி வளைப்பு..


சோழவரம் : கன்டெய்னர் லாரிகளில் கொண்டு வரப்பட்ட, ஐந்து கோடி ரூபாய் சில்லரை நாணயங்கள் குறித்து, தேர்தல் பறக்கும் படையினர் விசாரணை மேற்கொண்டனர்.
பொன்னேரி சட்டசபை தொகுதிக்கு உட்பட்ட தேர்தல் பறக்கும் படை அதிகாரிகள், சென்னை கோல்கட்டா தேசிய நெடுஞ்சாலையில் வாகன சோதனை மேற்கொண்டு வருகின்றனர்.
நேற்று முன்தினம் நள்ளிரவு, தேர்தல் கண்காணிப்பு குழுவினர். அதிகாரி லட்சுமணன் தலைமையில், நல்லுார் சுங்கச் சாவடியில் வாகன சோதனை மேற்கொண்டனர்.
அடுத்தடுத்து வரிசையாக, சென்னை நோக்கி சென்ற, ஏழு கன்டெய்னர் லாரிகளை மடக்கினர். அவை பூட்டப்பட்டு, 'சீல்' வைக்கப்பட்டிருந்தன. வாகனத்தில் இருந்தவர்களிடம் விசாரித்தபோது, அவை, கோல்கட்டாவில் இருந்து வருவதாக 
தெரிவித்தனர்.
தொடர் விசாரணையில், லாரிகளில், ஐந்து கோடி ரூபாய் சில்லரை நாணயங்கள் இருப்பதாகவும், அவை, சென்னையில் உள்ள, ரிசர்வ் வங்கிக்கு கொண்டு செல்லப்படுவதாகவும் கூறினர்.
போதிய பாதுகாப்பு அதிகாரிகள் மற்றும் ஆவணங்கள் இல்லாததால், உரிய ஆவணங்களை காண்பித்துவிட்டு, எடுத்து செல்லும்படி அறிவுறுத்த பட்டது.
அதை தொடர்ந்து, ஏழு கன்டெய்னர் வாகனங்களுக்கும் போலீஸ் பாதுகாப்பு போடப்பட்டது. இது குறித்து, தகவல் அறிந்த ரிசர்வ் வங்கி அதிகாரிகள் விரைந்து சென்று, உரிய ஆவணங்களை காண்பித்தனர். அதன்பின், வாகனங்கள் விடுவிக்கப்பட்டன.

வேட்பாளரின் வாகன ஊர்வலம்:தடுக்க எல்லை கோடு அமைப்பு

திருவள்ளூர்:வேட்புமனு தாக்கல் இன்று துவங்குவதால், வேட்பாளருடன் வரும் வாகன எண்ணிக்கையை கட்டுப்படுத்த, எல்லைக்கோடு அமைக்கப்பட்டு உள்ளது.திருவள்ளூர் லோக்சபா தொகுதிக்கான வேட்புமனு, ஆட்சியர் அலுவலகத்தில் அளிக்க வேண்டும். வேட்புமனு தாக்கல் இன்று துவங்க உள்ளதால், வேட்பாளருடன் ஐந்து வாகனங்களில் மட்டுமே வரவேண்டும்.இதற்காக, ஆட்சியர் அலுவலகத்தில் இருந்து, 100 மீட்டர் தொலைவில், வாகனங்கள் ஊர்வலமாக வரக்கூடாது. இதற்காக, ஆட்சியர் அலுவலகத்தில் இருந்து, திருவள்ளூர் - திருப்பதி தேசிய நெடுஞ்சாலையின் இருபுறமும், 100 மீட்டர் தொலைவில் எல்லைக்கோட்டினை, வருவாய் துறை அலுவலர்கள், குறித்துள்ளனர்.வேட்புமனு தாக்கல் செய்பவர்களுடன், அதிகமாக வரும் வாகனங்களை, போலீசார் இந்த எல்லைக் கோட்டிலேயே நிறுத்தி, அனுமதிக்கப்பட்ட எண்ணிக்கையிலான வாகனங்களை மட்டும், செல்ல அனுமதி அளிப்பர்.வேட்புமனு தாக்கல் இன்று துவங்குவதை அடுத்து, ஆட்சியர் அலுவலகத்தில், ஏராளமான போலீசார், பாதுகாப்பு பணிக்கு குவிக்கப்பட்டு உள்ளனர்.

திருவள்ளூர் மாவட்டத்தில் அரசு ஓய்வூதியதாரர்கள் வாழ்நாள் சான்று அளிக்க வேண்டும் கலெக்டர் உத்தரவு ...

திருவள்ளூர் மாவட்ட கலெக்டர் வீரராகவராவ் வெளியிட்டுள்ள அறிக்கையில் கூறியிருப்பதாவது:–

திருவள்ளூர் மாவட்டத்தை சேர்ந்த தமிழ்நாடு அரசு ஓய்வூதியர்கள் மற்றும் குடும்ப ஓய்வூதியர்கள் அனைவருக்கும் 2014–15 நிதியாண்டிற்கான நேர்காணல் வருகிற 1–4–2014 முதல் 30–6–2014 வரை நடைபெறுகிறது. ஓய்வூதியதாரர்கள் தொடர்புடைய சார் கருவூல அலுவலகங்களுக்கு தங்களின் ஒய்வூதிய புத்தகத்துடன் நேர்காணல் செய்யவும். அல்லது உரிய மருத்துவரிடம் பெற்ற வாழ்நாள் சான்றை அளிக்கும்படியும் கேட்டுக்கொள்ளப்படுகிறார்கள். தவறும்பட்சத்தில் அவர்களின் ஓய்வூதியம் எந்த ஒரு முன்னறிவிப்பும் இன்றி ஆகஸ்டு மாதம் முதல் நிறுத்தப்படும் என்பதை இதன் மூலம் தெரிவித்து கொள்ளப்படுகிறது. மேலும் ஓய்வூதியம் மாதம் ரூ.18 ஆயிரத்துக்கும் மேல் பெறுபவர்கள் அனைவரும் தங்களின் வருமான வரி தொடர்பான படிவம் மற்றும் பான் எண், தொடர்பு கொள்ளவேண்டிய அலைபேசி எண் ஆகியவற்றை மாவட்ட கருவூல அலுவலரிடம் அளிக்க வேண்டும்.

இவ்வாறு அந்த அறிக்கையில் தெரிவிக்கப்பட்டுள்ளது.

திருவள்ளூர் (தனி) மக்களவைத் தொகுதியில் போட்டியிடும் 6 வேட்பாளர்களில் அதிமுக, காங்கிரஸ் உள்ளிட்ட 3 கட்சியினர் தனித்துப் போட்டி...

திருவள்ளூர் (தனி) மக்களவைத் தொகுதியில் போட்டியிடும் 6 வேட்பாளர்களில் அதிமுக, காங்கிரஸ் உள்ளிட்ட 3 கட்சியினர் தனித்துப் போட்டியிடுகின்றனர்.

மக்களவைத் தேர்தலில் திருவள்ளூர் தொகுதியில் இதுவரை அதிமுக, திமுக கூட்டணி சார்பில் விடுதலைச் சிறுத்தைகள் கட்சி, பாஜக கூட்டணி சார்பில் தேமுதிக, காங்கிரஸ், இந்திய கம்யூனிஸ்ட், மற்றும் பகுஜன் சமாஜ் கட்சி ஆகிய 6 வேட்பாளர்கள் போட்டியிடுகின்றனர்.

இதில் அதிமுக, காங்கிரஸ் மற்றும் பகுஜன் சமாஜ் கட்சி ஆகியோர் தனித்துப் போட்டியிடுகின்றனர். திருவள்ளூர் தொகுதியில் போட்டியிடும் 6 கட்சிகளின் வேட்பாளர்களும் அறிவிக்கப்பட்டுள்ள நிலையில் திங்கள்கிழமை முதல் வேட்புமனு தாக்கல் நடைபெறும் என்று கூறப்படுகிறது.

திருவள்ளூர் தொகுதியில் அதிமுக சார்பில் முன்னாள் எம்.பி. வேணுகோபால், திமுக சார்பில் கூட்டணியின் விடுதலைச் சிறுத்தைகள் கட்சியின் வேட்பாளராக ரவிக்குமார், பாஜக சார்பில் கூட்டணிக் கட்சியான தேமுதிகவின் வேட்பாளராக யுவராஜ், காங்கிரஸ் கட்சியின் வேட்பாளராக விக்டரி ஜெயக்குமார், இந்திய கம்யூனிஸ்ட் கட்சியின் வேட்பாளராக முன்னாள் எம்.எல்.ஏ. ஏ.எஸ்.கண்ணன், பகுஜன் சமாஜ் கட்சியின் வேட்பாளராக சத்தியமூர்த்தி ஆகியோர் நேரடியாக களத்தில் போட்டியிடவுள்ளனர்.

இந்த தேர்தலில் அந்தந்த கட்சியின் தலைமை அறிவிக்கும் தேர்தல் ஒருபுறம் இருந்தாலும், அறிக்கைகள் இருந்தாலும் திருவள்ளூர் தொகுதிக்கு உள்பட்ட மக்களின் அடிப்படை பிரச்னைகளுக்கு யார் அதிக முக்கியத்துவம் அளிக்கிறார்களோ அவர்களுக்குதான் மக்களிடையே வரவேற்பு இருக்கும் என மக்கள் தரப்பில்

கூறப்படுகிறது.

அச்சக உரிமையாளர்கள் தேர்தல் நடத்தை விதிமுறைகளை பின்பற்ற வேண்டும்.

அச்சக உரிமையாளர்கள் தேர்தல் நடத்தை விதிமுறைகளை பின்பற்ற வேண்டும். 

மார்ச்.26- 

திருவள்ளூரில் உள்ள மாவட்ட கலெக்டர் அலுவலக கூட்டரங்கில் பாராளுமன்ற தேர்தலை முன்னிட்டு திருவள்ளூர் மாவட்டத்தில் உள்ள அச்சக உரிமையாளர்கள் பின்பற்ற வேண்டிய தேர்தல் நடத்தை விதிமுறைகள் குறித்த ஆலோசனைக்கூட்டம் நடைபெற்றது. கூட்டத்தில் கலெக்டர் வீரராகவராவ் கலந்து கொண்டு பேசினார். அப்போது அவர் பேசியதாவது:- 

அச்சக உரிமையாளர்கள் தேர்தல் நடத்தை விதிமுறைகளை பின்பற்ற வேண்டும். மக்கள் பிரதிநிதித்துவ சட்டம் 1951 பிரிவு 127ஏ-ன்படி தேர்தல் தொடர்பான துண்டு பிரசுரங்கள், சுவரொட்டிகள் மற்றும் பேனர் விளம்பரங்கள் அச்சிடும் அச்சக உரிமையாளர்கள் மற்றும் வெளியீட்டாளரின் பெயர் மற்றும் முகவரி இடம்பெறாமல் அச்சிடக்கூடாது. 

எந்த ஒரு அச்சக உரிமையாளரும் தேர்தல் தொடர்பான விளம்பரத்தினை அச்சிடும்போது வெளியீட்டாளரின் உறுதி மொழி பெறாமல் அச்சிடக்கூடாது. அந்த உறுதிமொழி பெறப்பட வேண்டிய படிவம் ஏ-வை நிரப்பி அதனை அவர் கையொப்பமிட்டு அவருக்கு தெரிந்த 2 பேர் சாட்சி கையொப்பமிட்டு அச்சகதாரரிடம் அளிக்க வேண்டும். 

தேர்தல் தொடர்பான விளம்பரம் எந்த விதமான முறையில் நகல் எடுக்கப்பட்டாலும் அது அச்சிடப்படுவதாகவே கருதப்படும். அதற்கு அச்சிடுவதற்கு விதிக்கப்படும் அனைத்து கட்டுப்பாடுகளும் பொருந்தும். தேர்தல் தொடர்பான விளம்பரங்கள் (துண்டுபிரசுரம் மற்றும் சுவரொட்டிகள்) எனப்படுவது 

அந்த விளம்பரத்தில் தேர்தல் நடைபெறும் நாள், நேரம், இடம் மற்றும் தேர்தல் முகவர் அல்லது பணியாளருக்கு வழக்கமான குறிப்புகள் அளிக்கும் விவரங்கள் அடங்கியதனை தவிர்த்து மற்ற அனைத்து தேர்தல் தொடர்பான விளம்பரங்களும் தேர்தல் தொடர்பான விளம்பரங்கள் எனப்படும். 

எந்த ஒரு நபரும் மேற்கண்ட விதிமுறைகளை மீறினால் அவர் மீது சட்டப்படி நடவடிக்கை எடுக்கப்படும். மேலும் அவர்களுக்கு 6 மாதங்கள் வரை சிறை தண்டனையோ அல்லது ரூ. 2 ஆயிரம் வரை அபராதம் அல்லது இவை இரண்டுமோ விதிக்கப்படும். 

விளம்பரமானது சட்டத்திற்கு புறம்பானதாகவோ அல்லது எந்த ஓரு மதம், ஜாதி, இனம் மற்றும் மொழி ஆகியவற்றிற்கு எதிராகவோ அல்லது எந்த ஒரு தனிநபரின் பண்பினை குற்றம் சாட்டும் வகையிலோ இருக்க கூடாது. அச்சிடும் விளம்பரத்தின் 4 பிரதிகளுடன் வெளியீட்டாளரிடமிருந்து பெறப்பட்ட உறுதிமொழியுடன் சேர்த்து அச்சகத்தார் பி படிவத்தினை நிரப்பி கையொப்பமிட்டு மாவட்ட தேர்தல் அலுவலர் மற்றும் மாவட்ட கலெக்டருக்கு விளம்பரம் அச்சிடப்பட்டதில் இருந்து 3 நாட்களுக்குள் அனுப்பி வைக்கப்படவேண்டும்.

இந்த கூட்டத்தில் மாவட்ட வருவாய் அலுவலர் எ.ஜி.செல்வமணி, நேர்முக உதவியாளர்கள் புவியரசு (கணக்கு), உதவி தேர்தல் நடத்தும் அலுவலர் வரதராஜன் (ஆவடி) மற்றும் அச்சக உரிமையாளர்கள் கலந்து கொண்டனர்.

சூளைமேனியில் தாறுமாறாக ஓடிய கார் மோதி பெண் பலி

சூளைமேனியில் தாறுமாறாக ஓடிய கார் மோதி பெண் பலி

சூளைமேனி, மார்ச். 27

ஊத்துக்கோட்டை சூளை மேனி கிராமத்தை சேர்ந்தவர் குமார். இவரது மனைவி எல்லம்மாள் (வயது 55). நேற்று மாலை எல்லம்மாளும், அதே பகுதியை சேர்ந்த சின்னமுத்து மனைவி அற்புதமும் (40). ஊத்துக் கோட்டை பெரிய பாளைம் சாலையில் நடந்து சென்றனர்.

அப்போது பெரிய பாளையம் நோக்கி சென்ற கார் டிரைவர் கட்டுப்பாடை இழந்து தாறுமாறாக ஓடியது.

திடீரென நடந்து சென்ற எல்லம்மாள், அற்புதம் மீது கார் மோதியது. இதில் சம்பவ இடத்திலேயே எல்லம்மாள் பரிதாபமாக இறந்தார். அற்புதம் பலத்த காயம் அடைந்தார்.

அக்கம் பக்கத்தினர் அவரை மீட்டு சிகிச்சைக்காக ஊத்துக்கோட்டை அரசு ஆஸ்பத்திரிக்கு அனுப்பி வைத்தனர். அவருக்கு தீவிர சிகிச்சை அளிக்கப்படுகிறது. எல்லம்மாளின் உடல் பரிசோதனைக்காக திருவள்ளூர் அரசு ஆஸ்பத்திரியில் வைக்கப்பட்டு உள்ளது.

விபத்து நடந்ததும் அப்பகுதி மக்கள் கார் டிரைவர் கரடிபுத்தூரை சேர்ந்த வேலுவை பிடித்து ஊத்துக்கோட்டை போலீசில் ஒப்படைத்தனர். அவரை போலீசார் கைது செய்து விசாரணை நடத்தி வருகிறார்கள்.

தேர்தல் விளம்பரம் அனுமதி அவசியம் - மாவட்ட ஆட்சியர்

லோக்சபா தொகுதியில் போட்டியிடும் வேட்பாளரோ, அரசியல் கட்சியினரோ, 
நாளிதழ், தொலைக்காட்சிகளில், விளம்பரம் செய்திட, ஊடக சான்றளித்தல் 
மற்றும் கண்காணிப்பு குழுவிடம், மூன்று நாட்களுக்கு முன்பாக விண்ணப்பித்து உரிய அனுமதி பெற வேண்டும் என, மாவட்ட தேர்தல் அலுவலர் மற்றும் ஆட்சியர் அறிவித்து உள்ளார்.
திருவள்ளுர் ஆட்சியர் அலுவலக கூட்ட அரங்கில், கேபிள் 'டிவி'களில் தேர்தல் விளம்பரம் ஒளி பரப்புவது குறித்த ஆலோசனைக் கூட்டம், நேற்று நடந்தது. 

கூட்டத்தில், ஆட்சியர் வீர ராகவ ராவ், பேசியதாவது:

தேர்தலில் போட்டியிடும் வேட்பாளர் அல்லது பதிவு பெற்ற அரசியல் கட்சி நாளிதழ்கள், வானொ லியில், தொலைக்காட்சி அலைவரிசைகளில் அல்லது சமூக வலைதளங்களில், வெளியிட கருதியுள்ள விளம்பரங்களுக்கு கண்டிப்பாக, ஊடக சான்றளித்தல் மற்றும் கண்காணிப்புக் குழுவிடம் சான்றி தழ்கள் பெறப்பட்டிருக்க வேண்டும். விளம்பரம் ஒலிபரப்பாகவுள்ள மூன்று நாட்களுக்கு முன், விண்ணப்பம் தாக்கல் செய்யப்பட்டு அனுமதி பெற வேண்டும். மேற்படி விளம்பரத்திற்குண்டான கட்டண தொகையினை, காசோலையாகவே பெறப்பட வேண்டும்.இவ்வாறு, அவர் கூறினார்.

கண்ணன்கோட்டையில் தேர்தல் புறக்கணிப்பு அறிவிப்பு

கும்மிடிப்பூண்டியை அடுத்த கண்ணன்கோட்டை பகுதியில் தமிழக அரசின் நீர்தேக்கத் திட்டத்தை எதிர்த்து அப்பகுதியினர் தேர்தல் புறக்கணிப்பை அறிவித்துள்ளனர்.

மேலும் எதிர்ப்பைக் காட்டும் விதமாக அப்பகுதியில் வீடுகள்தோறும் கருப்புக் கொடி ஏற்றப்பட்டுள்ளது.

கண்ணன்கோட்டை பகுதியில் ரூ.330 கோடி மதிப்பில் நீர்தேக்கத் திட்டத்தை மேற்கொள்ள தமிழக அரசு முடிவெடுத்து பணிகள் நடைபெற்று வருகிறது. இந்த திட்டத்தால் அப்பகுதியில் 650 ஏக்கர் விவசாயப் பட்டா நிலங்கள் கையகப்படுத்தப்பட இருப்பதால் விவசாயம் பாதிக்கப்படும் எனக் கூறி கிராம மக்கள் எதிர்ப்பு தெரிவித்து வருகின்றனர்.

இதனை கண்டித்து கிராமத்தினர் பல்வேறு ஆர்ப்பாட்டங்களை நடத்தி வந்தனர்.

இதையொட்டி மக்களிடம் அரசு தரப்பில் சமாதானப் பேச்சுவார்த்தை நடைபெற்றது.

ஆனால் இதில் சுமுக தீர்வு எட்டப்படவில்லை. இதனைத்தொடர்ந்து இந்த திட்டத்தை மாற்றுப்பாதையில் நிறைவேற்ற வேண்டும் என கிராம மக்கள் வலியுறுத்தி வந்தனர்.

ஆனால் இந்த கோரிக்கையை அரசு ஏற்காததால் கண்ணன்கோட்டை பகுதி மக்கள் தேர்தல் புறக்கணிப்பை அறிவித்தனர்.

இந்நிலையில் வியாழக்கிழமை கண்ணன்கோட்டை பகுதியில் தேர்தல் புறக்கணிப்பு குறித்து பேனர்கள் ஆங்காங்கே வைக்கப்பட்டிருந்தன. மேலும் வீடுகளின் முன்பு கருப்புக் கொடிகள் கட்டப்பட்டிருந்தன.

இதுகுறித்து தகவல் அறிந்ததும் கண்ணன்கோட்டை பகுதிக்கு வருவாய்த்துறையினர் சென்று விசாரணை மேற்கொண்டு வருகின்றனர்.