ஊத்துக்கோட்டை அருகே ஆக்கிரமிப்புகளை அகற்ற கோரி கிராம மக்கள் சாலை மறியல் போராட்டத்தில் ஈடுபட்டனர். இதனால் போக்குவரத்து பாதிக்கப்பட்டது.

ஊத்துக்கோட்டை அருகே ஆக்கிரமிப்புகளை அகற்ற கோரி கிராம மக்கள் சாலை மறியல் போராட்டத்தில் ஈடுபட்டனர். இதனால் போக்குவரத்து பாதிக்கப்பட்டது.

ஆக்கிரமிப்பு

ஊத்துக்கோட்டை அருகே உள்ள லட்சிவாக்கம் ஊராட்சியில் பெரம்பூர், லட்சிவாக்கம்காலனி போன்ற பகுதிகள் உள்ளன. நேற்று முன்தினம் இரவு லட்சிவாக்கம் பகுதியை சேர்ந்த சிலர் பெரம்பூர் கிராமத்துக்கு செல்லும் வழியில் உள்ள காலி இடத்தை ஆக்கிரமித்து குடிசைகள் அமைப்பதற்காக கம்புகளை நட்டனர். 

இதை பார்த்த பெரம்பூர் கிராம மக்கள் அதை அகற்றும் படி கூறினர். அதற்கு ஆக்கிரமிப்பாளர்கள் எதிர்ப்பு தெரிவித்தனர்.

மறியல்

இதையடுத்து அந்த பகுதியை சேர்ந்த பொதுமக்கள் ஊத்துக்கோட்டை-பெரியபாளையம் சாலையில் திடீர் என்று மறியலில் ஈடுபட்டனர். தகவல் அறிந்ததும் ஊத்துக்கோட்டை தாசில்தார் விஜயலட்சுமி, எல்லாபுரம் வட்டார வளர்ச்சி அலுவலர்கள் சீதாலட்சுமி, ராஜராஜன், ஊத்துக்கோட்டை துணை போலீஸ் சூப்பிரண்டு மாணிக்கம், பெரியபாளையம் இன்ஸ்பெக்டர் வெங்கடாசலம் ஆகியோர் சம்பவ இடத்துக்கு விரைந்து சென்று சாலை மறியலில் ஈடுபட்டவர்களுடன் சமரச பேச்சுவார்த்தை நடத்தினர்.

உரிய நடவடிக்கை எடுக்கப்படும் என்று அதிகாரிகள் உறுதி அளித்ததன் பேரில் கிராம மக்கள் சாலை மறியலை விலக்கிக் கொண்டனர். இதனால் ஊத்துக்கோட்டை - பெரிபாளையம் இடையே 2 மணி நேரம் போக்குவரத்து பாதிக்கப்பட்டது. 

அதிக விலைக்கு உரம் விற்றால் உரிமம் ரத்து

திருவள்ளூர் மாவட்டத்தில் அதிக விலைக்கு உரம் விற்றால் கடைகளின் உரிமம் ரத்து செய்யப்படும் என்று மாவட்ட ஆட்சியர் கொ.வீரராகவ ராவ் எச்சரித்தார்.

திருவள்ளூர் மாவட்ட உர விற்பனையாளர்களுக்கான புத்தாக்கப் பயிற்சிக் கூட்டம் ஆட்சியர் அலுவலகத்தில் செவ்வாய்க்கிழமை நடைபெற்றது.

கூட்டத்துக்கு மாவட்ட ஆட்சியர் கொ.வீரராகவ ராவ் தலைமை வகித்துப் பேசியபோது, அரசு நிர்ணயித்துள்ள விற்பனை விலையை விட கூடுதல் விலைக்கு உரங்களை விற்கக் கூடாது. அதிக விலைக்கு விற்பதாக புகார்கள் வந்தால் அந்த நிறுவனத்தின் உரிமம் ரத்து செய்யப்படும் என்றார்.

உதவி இயக்குநர் எல்.சுரேஷ், துணை இயக்குநர்கள் ஸ்டான்லி, எபிநேசன் ஆகியோர் பயிற்சி அளித்தனர். இதில், தொடக்க வேளாண்மை கடன் சங்கச் செயலர்கள், உர விற்பனையாளர்கள் பங்கேற்றனர். சண்முகம் நன்றி கூறினார்.

சிப்காட் தொழிற்பேட்டையால் காற்று மாசு:தடுக்கக் கோரி மாவட்ட ஆட்சியரிடம் மனு

கும்மிடிப்பூண்டி சிப்காட் தொழிற்பேட்டையில் உள்ள பல தொழிற்சாலைகளால் காற்று மாசு அடைவதாகவும், அதைத் தடுக்க நடவடிக்கை எடுக்க வேண்டும் எனவும் வலியுறுத்தி, மாவட்ட ஆட்சியர் கொ.வீரராகவ ராவிடம் செவ்வாய்க்கிழமை மனு அளிக்கப்பட்டது.

இது தொடர்பாக, காந்தி உலக மைய நிறுவனர் எம்.எல்.ராஜேஷ் அளித்த அந்த மனுவில் கூறியிருப்பதாவது:

கும்மிடிப்பூண்டியில் மாநகரப் போக்குவரத்துக் கழகப் பணிமனை அமைக்கும் பணியை துரிதப்படுத்த வேண்டும். அரசு மருத்துவமனையில் 24 மணி நேரமும் மருத்துவர் பணியில் இருக்க வேண்டும்.

திடக்கழிவு மேலாண்மைத் திட்டம் செயல்பட உரிய இடத்தைத் தேர்வு செய்து பேரூராட்சியை குப்பைகளற்ற வகையில் மாற்ற நடவடிக்கை எடுக்க வேண்டும்.

ஆந்திர மாநிலக் காடுகளில் இருந்து வரும் மழைநீர் வீணாகக் கடலில் கடக்கிறது. அந்த நீரை சேமித்து விவசாயத்து பயன்படுத்தும் வகையில், மேற்கண்ட கால்வாயை தூர்வாரி 3 இடங்களில் தடுப்பணை கட்ட வேண்டும்.

சுமார் 3 லட்சம் மக்கள் வசிக்கும் கும்மிடிப்பூண்டியில் உரிமையியல், குற்றவியல் நடுவர் நீதிமன்றங்களை அமைக்க வேண்டும். கும்மிடிப்பூண்டியில் மேம்பாலம் அமைக்கும் பணியை துரிதப்படுத்தி, பேருந்து நிலையத்தில் நேரக் காப்பாளரை பணியில் அமர்த்தி, அனைத்துப் பேருந்துகளும் பேருந்து நிலையத்துக்கு வந்து செல்ல வழிவகை செய்ய வேண்டும்.

கும்மிடிப்பூண்டி சிப்காட், சுற்றுப்புறப் பகுதிகளில் இயங்கி வரும் 300-க்கும் மேற்பட்ட தொழிற்சாலைகளால் காற்று மாசடைந்து சுவாசிக்கத் தகுதியற்றதாக மாறி வருகிறது. எனவே, காற்று மாசு கண்காணிப்பு நிலையம் அமைத்து, காற்று மாசை ஏற்படுத்தும் தொழிற்சாலைகள், நிலத்தடி நீர் குறைவுக்குக் காரணமான தொழிற்சாலைகள் மீது நடவடிக்கை எடுக்க வேண்டும்.

கும்மிடிப்பூண்டியில் திறந்தவெளி, உள் விளையாட்டு அரங்கம் கட்டித்தர வேண்டும் என்று அந்த மனுவில் குறிப்பிடப்பட்டுள்ளது.

அப்போது, கும்மிடிப்பூண்டி வட்டாட்சியர் பால்சாமி, காந்தி உலக மையத்தைச் சேர்ந்த ரவி, மோகன்ராஜ், வெங்கடேஸ்வரலு உள்ளிட்ட பலர் இருந்தனர்

அனந்தேரி - கிருஷ்ண நதிநீர் கால்வாயில் பெண் தவறி விழுந்தார்...

ஆந்திராவில் உள்ள கண்டலேறு அணையில் இருந்து பூண்டி ஏரிக்கு தற்போது தண்ணீர் வந்து கொண்டிருக்கிறது. ஆகையால் கிருஷ்ணா நதி கால்வாயில் வெள்ளம் கரை புரண்டு ஓடுகிறது. இந்த நிலையில் ஊத்துக்கோட்டை அருகே உள்ள அனந்தேரி கிராமத்தை சேர்ந்த ரவி என்பவரது மனைவி ஹேமலதா (45) நேற்று மதியம் கிருஷ்ணா நதி கால்வாயின் கரையில் துணி துவைத்து கொண்டிருந்தார். 

அப்போது அவர் நிலை தடுமாறி கால்வாயில் விழுந்து விட்டார். இதனால் அவர் வெள்ளத்தில் அடித்து செல்லப்பட்டார். அங்கிருந்த இளைஞர்கள் சிலர் கால்வாயில் குதித்து அவரை தேடும் பணியில் ஈடுபட்டனர்.

அவர்களுடன் தியணைப்பு படையினரும் தேடினார்கள் ஆனாலும் அந்த பெண் குறித்த எந்த தடையமும் கிடைக்கவில்லை. 

இதனால் அனந்தேரி கிரமமே சோகத்தில் ஆழ்ந்துள்ளது..

ஓட்டுக்கு பணம் வாங்குவதும், கொடுப்பதும் குற்றமாகும். ஆகையால் மனசாட்சிப்படி வாக்களியுங்கள்.- மாவட்ட ஆட்சியர் வீரராகராவ்

தமிழ்நாட்டில் பாராளுமன்ற தேர்தல் வருகிற 24–ந்தேதி நடைபெற உள்ளது. இதற்கான ஏற்பாடுகள் முழுவீச்சில் நடைபெற்று வருகின்றன. அதில் ஒரு அங்கமாக வாக்குச்சாவடி சீட்டு வழங்கும் பணியை திருவள்ளூர் மாவட்ட கலெக்டர் வீரராகராவ் ஊத்துக்கோட்டை பேரூராட்சிக்கு உள்பட்ட அம்பேத்கார்நகரில் நேற்று மாலை தொடங்கி வைத்து பேசினார்.

திருவள்ளூர் மாவட்டத்தில் மொத்தம் 24 லட்சத்து 84 ஆயிரத்து 262 வாக்காளர்கள் உள்ளனர். வருகிற 19–ந்தேதி வரை வாக்குச்சாவடி அதிகாரிகள் வீடு வீடாக சென்று வாக்குச்சாவடி சீட்டு வழங்குவார்கள். 

ஓட்டுக்கு பணம் வாங்குவதும், கொடுப்பதும் குற்றமாகும். ஆகையால் மனசாட்சிப்படி வாக்களியுங்கள்.

இவ்வாறு அவர் பேசினார்.

நிகழ்ச்சியில் கும்மிடிப்பூண்டி சட்டமன்ற தொகுதி உதவி தேர்தல் அதிகாரி பரந்தாமன், ஊத்துக்கோட்டை தாசில்தார் சுப்பிரமணி, துணை தாசில்தார் லதா ஆகியோர் கலந்து கொண்டனர்.

திருவள்ளுர் தனி தொகுதியில் மொத்த வாக்காளர்களின் எண்ணிக்கை 17 லட்சத்து 2 ஆயிரத்து 114 பேர்.

திருவள்ளூர் கலெக்டர் அலுவலகத்தில்  மாவட்ட கலெக்டரும், மாவட்ட தேர்தல் அலுவலருமான கொ.வீரராகவராவ் துணை வாக்காளர் பட்டியலை வெளியிட்டார். 

அதன்படி திருவள்ளூர் மாவட்டத்தில் உள்ள 10 சட்டமன்ற தொகுதிகளில் வாக்காளர்கள் எண்ணிக்கை வருமாறு:–

கும்மிடிப்பூண்டியில் தொகுதியில்

ஆண் வாக்காளர்கள் 1 லட்சத்து 20 ஆயிரத்து 408 பேர்.

 பெண்கள் 1 லட்சத்து 23 ஆயிரத்து 82 பேர். 

இதரர் 31 பேர். 

மொத்தம் 2 லட்சத்து 43 ஆயிரத்து 521 பேர். 

பொன்னேரியில் தொகுதியில்

ஆண் வாக்காளர்கள் 1 லட்சத்து 14 ஆயிரத்து 97 பேர். 

பெண்கள் 1 லட்சத்து 14 ஆயிரத்து 502 பேர். 

இதரர் 58 பேர். 

மொத்தம் 2 லட்சத்து 28 ஆயிரத்து 657 பேர். 

திருவள்ளூர் தொகுதியில்

ஆண் வாக்காளர்கள் 1 லட்சத்து 16 ஆயிரத்து 932 பேர், 

பெண்கள் 1 லட்சத்து 18 ஆயிரத்து 551 பேர். 

இதரர் 17 பேர் 

மொத்தம் 2 லட்சத்து 35 ஆயிரத்து 500 பேர். 

பூந்தமல்லி தொகுதியில்

ஆண் வாக்காளர்கள் 1 லட்சத்து 40 ஆயிரத்து 712 பேர். 

பெண்கள் 1 லட்சத்து 40 ஆயிரத்து 110 பேர். 

இதரர் 35 பேர். 

மொத்தம் 2 லட்சத்து 80 ஆயிரத்து 857 பேர். 

ஆவடி தொகுதியில்

ஆண் வாக்காளர்கள் 1 லட்சத்து 79 ஆயிரத்து 323 பேர். 

பெண்கள் 1 லட்சத்து 74 ஆயிரத்து 928 பேர். 

இதரர் 57 பேர்  

மொத்தம் 3 லட்சத்து 54 ஆயிரத்து 308 பேர். 

மாதவரம் தொகுதியில்

 ஆண் வாக்காளர்கள் 1 லட்சத்து 80 ஆயிரத்து 803 பேர், 

பெண்கள் 1 லட்சத்து 78 ஆயிரத்து 404 பேர். 

இதரர் 64 பேர். 

மொத்தம் 3 லட்சத்து 59 ஆயிரத்து 271 பேர் உள்ளனர்.

திருவொற்றியூர் சட்டமன்ற தொகுதியில் 

ஆண் வாக்காளர்கள் 1 லட்சத்து 32 ஆயிரத்து 1 பேர். 

பெண்கள் 1 லட்சத்து 30 ஆயிரத்து 651 பேர். 

இதரர் 54 பேர். 

மொத்தம் 2 லட்சத்து 62 ஆயிரத்து 706 பேர். 

மதுரவாயல் சட்டமன்ற தொகுதியில்

 ஆண் வாக்காளர்கள் 1 லட்சத்து 78 ஆயிரத்து 259 பேர். 

பெண்கள் 1 லட்சத்து 70 ஆயிரத்து 633 பேர், 

இதரர் 79 பேர். 

மொத்தம் 3 லட்சத்து 48 ஆயிரத்து 971 பேர் ஆகும்.

திருவள்ளூர் (தனி) பாராளுமன்ற தொகுதியில் அடங்கிய 6 தொகுதியில் 

மொத்த வாக்காளர்களின் எண்ணிக்கை 17 லட்சத்து 2 ஆயிரத்து 114 பேர். 

இதில் மொத்த ஆண் வாக்காளர்கள் 8 லட்சத்து 52 ஆயிரத்து 275 பேர், 

பெண் வாக்காளர்கள் 8 லட்சத்து 49 ஆயிரத்து 577 பேர், 

இதரர் 262 பேர் உள்ளனர்

புதிய வாக்காளர்கள்

அம்பத்தூர் சட்டமன்ற தொகுதியில்

 ஆண் வாக்காளர்கள் 1 லட்சத்து 59 ஆயிரத்து 800 பேர். 

பெண்கள் 1 லட்சத்து 53 ஆயிரத்து 759 பேர். 

இதரர் 60 பேர். மொத்தம் 3 லட்சத்து 13 ஆயிரத்து 619 பேர்.

 திருத்தணி சட்டமன்ற தொகுதியில் 

ஆண் வாக்காளர்கள் 1 லட்சத்து 27 ஆயிரத்து 510 பேர்.

 பெண்கள் 1 லட்சத்து 29 ஆயிரத்து 827 பேர்

,இதரர் 19 பேர்.

 மொத்தம் 2 லட்சத்து 57 ஆயிரத்து 356 பேரும் உள்ளனர்.

திருவள்ளூர் மாவட்டத்தில் 

ஆண் வாக்காளர்கள் 14 லட்சத்து 49 ஆயிரத்து 845 பேரும் 

பெண் வாக்காளர்கள் 14 லட்சத்து 34 ஆயிரத்து 447 பேரும் 

இதரர் 474 என 

மொத்த வாக்காளர்கள் 28 லட்சத்து 84 ஆயிரத்து 766 பேர் உள்ளனர்.

திருவள்ளூர் மாவட்டத்தில் தற்போது புதிய வாக்காளர்களாக 

ஆண்கள் 46 ஆயிரத்து 348 பேரும் 

பெண்கள் 47 ஆயிரத்து 530 பேரும் 

இதரர் 34 பேர் என 

மொத்தம் 93 ஆயிரத்து 912 பேர் வாக்காளர் பட்டியலில் சேர்க்கப்பட்டுள்ளனர்.

இவ்வாறு திருவள்ளூர் மாவட்ட கலெக்டர் கொ.வீரராகவராவ் தெரிவித்துள்ளார்.

திருவள்ளுர் தனி தொகுதியில் அதிமுக மற்றும் திமுக விற்கு சரிவு ஏற்படுமா ?

திருவள்ளுர் தனி தொகுதியில் அதிமுக மற்றும் திமுக விற்கு சரிவு ஏற்படுமா ?

வரும் 24.4.14 அன்று நடைபெறவிருக்கும் மக்களவை தேர்தலில் திருவள்ளுர் தனி தொகுதியில் மொத்தம் 14 பேர் போட்டியிடுகின்றனர். இதில் 6 நபர்கள் சுயேட்சைகளாக போட்டியிடுகின்றனர்..

இதில் அ.தி.மு.க சார்பிரல் போட்டியிடும் வேட்பாளர் பெயரும் சுயேட்சையாக போட்டியிடும் வேட்பாளர் பெயரும் பி.வேணுகோபால் என ஓரே பெயரை கொண்டிருப்பதால் அ.தி.மு.க இது அதிமுகவிற்கு பாதகமான முடிவையே ஏற்படுத்தும் என அரசியல் பார்வையாளர்கள் கருதுகின்றனர்..

இதே போல் விடுதலை சிறுத்தைகள் சார்பில் போட்டியிடும் துரை.ரவிக்குமார் பெயரை கொண்ட சுயேட்சை வேட்பாளர் பெயரும் ரவிக்குமார் தான் ஆனார் இவருக்கு இனிசியல் வேறு..

தேர்தல் நேரங்களில் பெரும்பாலன நபர்கள் வேட்பாளர்களின் பெயர்களை படித்தே வாக்களிப்பதால் அதிமுக மற்றும் திமுக விற்கு சரிவு ஏற்படும் எனவும் அரசியல் பார்வையாளர்கள் கருதுகின்றனர்.

மக்களின் முடிவு என்ன காத்திருப்போம் - மே 16 வரை...

13-4-14 தேதி, டாஸ்மாக் கடைகள் மூடப்பட்டுஇருக்கும்...

மகாவீர் ஜெயந்தியை முன்னிட்டு, வரும், 13ம் தேதி, திருவள்ளூர் மாவட்டத்தில் உள்ள, டாஸ்மாக் கடைகள், 'குடி' மையங்கள் மற்றும் ஓட்டல்களில் இயங்கும், 'குடி' மையங்கள் அனைத்தும், மூடப்பட்டிருக்க வேண்டும்.
இத்தகவலை, திருவள்ளுர், மாவட்ட ஆட்சியர் வீர ராகவ ராவ், தெரிவித்து உள்ளார்.

ஊத்துக்கோட்டை அருகே மனைவி கண்டித்ததால் கணவர் பூச்சி மருந்து குடித்து தற்கொலை

ஊத்துக்கோட்டை அருகே மனைவி கண்டித்ததால் கணவர் பூச்சி மருந்து குடித்து தற்கொலை செய்தார்.

தகராறு

ஊத்துக்கோட்டை அருகே அஞ்சாம்பேடு கிராமத்தை சேர்ந்தவர் செல்வம் (வயது 30) பூ பறிக்கும் தொழில் செய்து வந்தார். இவரது மனைவி சண்முகவள்ளி (25). இவர்களுக்கு மகன், மகள் உள்ளனர். செல்வம் பூ பறித்து கொண்டு வரும் பணத்தில்தான் குடும்ப செலவுகள் நடைபெற்று வந்தன. இதனிடையே அவர் கடந்த 2 நாட்களாக பூ பறிக்கும் வேலைக்கு செல்லாமல் வீட்டில் இருந்தார்.

இதை சண்முகவள்ளி கண்டித்தார். இது குறித்து கணவன், மனைவி இடையே தகராறு ஏற்பட்டது.

தற்கொலை

இதனால் மனவேதனை அடைந்த செல்வம் பூச்சி மருந்து குடித்து விட்டு கிராம எல்லையில் உள்ள வயலுக்கு சென்று மயங்கி கிடந்தார். அந்த வழியாக சென்றவர்கள் அவரை மீட்டு சென்னை கீழ்பாக்கம் ஆஸ்பத்திரியில் அனுமதித்தனர்.. அங்கு சிகிச்சை பலனின்றி அவர் இறந்தார்.

இது குறித்து ஊத்துக்கோட்டை சப் இன்ஸ்பெக்டர் வேலு வழக்குப்பதிவு செய்து விசாரித்து வருகிறார்.

தி.த

திருவள்ளூர் வடமதுரையில் நடைபெற்ற பொதுக்கூட்டத்தில் முதல்–அமைச்சர் ஜெயலலிதா

திருவள்ளூர் வடமதுரையில் நடைபெற்ற பொதுக்கூட்டத்தில் முதல்–அமைச்சர் ஜெயலலிதா பேசியதாவது:–

மகத்தான வெற்றி

2011–ம் ஆண்டு நடந்து முடிந்த சட்டமன்ற தேர்தலில், அ.தி.மு.க.வை எந்த அளவுக்கு வெற்றி பெற வைத்தீர்களோ, அதைவிட மகத்தான வெற்றியை நடைபெற உள்ள பாராளுமன்ற பொதுத்தேர்தலில், அ.தி.மு.க.விற்கு நீங்கள் வழங்க வேண்டும் என்ற வேண்டுகோளினை உங்கள் முன் வைப்பதற்காகவே நான் இங்கே வந்திருக்கின்றேன். எனது வேண்டுகோளினை நீங்கள் நிறைவேற்றுவீர்கள் என்ற நம்பிக்கை எனக்கு முழுமையாக உண்டு.

கருணாநிதி கட்டிய கட்டிடம்

ஈரோட்டில் நடைபெற்ற பொதுக்கூட்டத்தில் பேசிய கருணாநிதி கடந்த ஆட்சியில் கட்டப்பட்ட சட்டசபைக்கான புதிய கட்டிடத்தை மருத்துவமனையாக அ.தி.மு.க. ஆட்சி மாற்றியது என்று கூறி, இது கருணாநிதி கட்டிய கட்டிடம் என்பதால் தான் மாற்றப்பட்டது என்று பொய் பிரசாரம் செய்துள்ளார்.

தமிழக அரசாங்கத்தில் 36 துறைகள் உள்ளன. கருணாநிதி காலத்தில் கட்டப்பட்ட புதிய தலைமை செயலக கட்டிடத்தில் வெறும் 6 துறைகளும், முதல்–அமைச்சர் உட்பட அமைச்சர்களின் அலுவலகங்கள் மட்டுமே செயல்பட்டு வந்தன. மீதமுள்ள 30 துறைகள் பழைய புனித ஜார்ஜ் கோட்டையில் தான் செயல்பட்டு வந்தன. இதன் காரணமாக மக்களும் அரசு அதிகாரிகளும் புதிய தலைமை செயலக கட்டிடம், புனித ஜார்ஜ் கோட்டை என இரு இடங்களுக்கும் அலைந்து கொண்டு இருந்தார்கள். அமைச்சர்களின் அலுவலக அறைகள் மட்டுமே புதிய கட்டிடத்தில் இடம் பெற்றிருந்தன.

நீதிமன்றத்தில் வழக்கு

அந்த அமைச்சர்களின் துறை செயலாளர்களுக்கான அலுவலகங்கள் புதிய கட்டிடத்தில் இடம் பெறவில்லை. அரசு செயலாளர்களின் அலுவலகங்கள் மற்றும் துறைகளின் அலுவலகங்கள் பழைய புனிய ஜார்ஜ் கோட்டையில் தான் இருந்தன. அமைச்சர்கள் ஓர் இடத்திலும், அதிகாரிகள் வேறு இடத்திலும் என 2 இடங்களில் இருந்தால் தலைமை செயலகம் எப்படி செயல்பட முடியும்?. கருணாநிதி செய்த குழப்பத்தினால் அத்தகைய கேலிக்கூத்தான நிலைமை தான் நிலவியது.

எனவே தான், மக்கள் நலனை கருத்தில் கொண்டு, ஏழை, எளிய மக்கள் பல்வேறு நோய்களுக்கும், தரமான, உயரிய சிகிச்சையினை கட்டணம் ஏதுமின்றி பெறும் வகையில், டெல்லியில் உள்ள எய்ம்ஸ் மருத்துவமனைக்கு இணையான பல துறை உயர் சிறப்பு மருத்துவமனையை அந்த புதிய கட்டிடத்தில் அமைக்க நான் உத்தரவிட்டேன்.

முதலில் இதை வரவேற்றார் கருணாநிதி. பின்னர், இந்த மருத்துவமனை வருவதை எதிர்த்து, நீதிமன்றத்தில் வழக்கு தொடுக்க ஏற்பாடும் செய்தார். கருணாநிதியின் கெடுமதி எண்ணத்தையும் மீறி, இந்த மருத்துவமனை தற்போது சிறப்பாக செயல்பட்டு வருகிறது. நாள்தோறும் ஏழை, எளிய மக்கள் இதன் மூலம் பயன் அடைந்து வருகின்றனர்.

2 கட்டிடங்களில் இருந்து கொண்டு அரசு நிர்வாகத்தை நடத்தவே முடியாது என்பதால் தான் புனித செயின்ட் ஜார்ஜ் கோட்டையிலேயே தலைமை செயலகம் இயங்கி வருகிறதே தவிர, கருணாநிதி கட்டிய கட்டிடம் என்பதால் புதிய கட்டிடத்தை புறக்கணிக்கவில்லை.

வாக்கு சக்தி படைத்தது

தற்போது, தேர்தல் சமயத்தில் இதை வைத்து அரசியல் ஆதாயம் தேடலாம் என்ற முயற்சியில் இதுபோன்ற பொய் பிரசாரத்தை கருணாநிதி செய்து வருகிறார். கருணாநிதியின் பொய் பிரசாரம் நிச்சயம் எடுபடாது என்பதை தெரிவித்துக்கொள்கிறேன்.

பிரதமர் பதவி முக்கியம் அல்ல

கடந்த ஒரு மாத காலமாக நான் மேற்கொண்டுள்ள சூறாவளி தேர்தல் பிரசாரத்தில் மக்கள் அலை கடலென திரண்டு வருகிறார்கள். மக்கள் வெள்ளம் நாளுக்கு நாள் அதிகரித்துக்கொண்டே வருகிறது. இதனை கண்டு எதிர்க்கட்சிகள் கலங்கிப்போய் இருக்கின்றன. குறிப்பாக தி.மு.க. மிரட்சி அடைந்துள்ளது. விரக்தி அடைந்துள்ளது. எனவே தான் தி.மு.க.வினர் தற்போது, அ.தி.மு.க. 40 தொகுதிகளிலும் வெற்றி பெற்றாலும் ஜெயலலிதா பிரதமர் ஆக முடியாது என்று சொல்ல ஆரம்பித்துள்ளனர். அதாவது, அ.தி.மு.க. 40 தொகுதிகளிலும் வெற்றி பெறும் என்பதை தி.மு.க.வினரே உணர துவங்கிவிட்டனர்.

கோவை மாவட்டத்தில் பேசிய தி.மு.க. தலைவர் கருணாநிதியும், அ.தி.மு.க.விற்கு வாக்களித்தால் சாபம் இடுவதாக கூறியுள்ளார். எங்களைப் பொறுத்தவரையில் பிரதமர் பதவி என்பதோ, அமைச்சர் பதவி என்பதோ முக்கியமல்ல. தமிழ்நாட்டிற்கு என்னென்ன திட்டங்களை செயல்படுத்த முடியும் என்பதும், தமிழகத்திற்கு என்ன நன்மைகளை செய்ய முடியும் என்பது தான் எங்களது சிந்தனை. எனக்கு வரும் கூட்டத்தை கண்டு எதிர்க்கட்சிகள் மிரட்சி அடைவதிலோ, விரக்தி அடைவதிலோ ஆச்சரியப்படுவதற்கு ஒன்றுமில்லை.

விந்தையான ஆணை

ஆனால், இங்கு கூடுகிற கூட்டத்திற்கு தேர்தல் ஆணையம் சில கட்டுப்பாடுகளை விதித்து இருப்பது தான் எனக்கு வியப்பாக உள்ளது. அ.தி.மு.க.வின் சார்பில் போட்டியிடும் வேட்பாளரை ஆதரித்து நான் பிரசாரம் செய்யும் போது, அந்த தொகுதி வேட்பாளர் கலந்து கொள்ளக்கூடாது, மேடையில் இருக்கக்கூடாது, அவரது புகைப்படமும் இருக்கக்கூடாது, வேட்பாளரின் பெயரை கூட நான் உச்சரிக்க கூடாது, ‘‘இத்தொகுதியின் வேட்பாளர் இவர் தான்’’ என்று கூட நான் சொல்லக்கூடாது என்றெல்லாம் இதுவரையில் தேர்தல் வரலாற்றிலேயே இல்லாத அளவுக்கு விந்தையான ஆணைகளை தேர்தல் ஆணையம் பிறப்பித்துள்ளது.

அவ்வாறு மீறி வேட்பாளருடைய பெயரை நான் உச்சரித்தாலோ, அல்லது அவர் மேடையில் இருந்தாலோ அல்லது அவரது புகைப்படம் இருந்தாலோ, இந்தக் கூட்டத்திற்கான அனைத்து செலவுகளையும் தேர்தல் ஆணையம் வேட்பாளர் கணக்கில் சேர்த்து விடுமாம். வாக்காள பெருமக்களாகிய நீங்கள் உங்கள் சொந்த செலவில் வாகனங்களில் வந்து செல்லும் செலவும் வேட்பாளர் கணக்கில் சேர்க்கப்படும் என்று தேர்தல் ஆணையம் சொல்லி உள்ளது. இது என்ன நியாயம்?.

அ.தி.மு.க.வை பொறுத்தவரையில், என்னை பொறுத்தவரையில், மேடை அமைப்பு, தோரணங்கள், பதாகைகள், கட்அவுட்டுகள், நாற்காலிகள் போன்ற செலவுகளை வேட்பாளர் கணக்கில் சேர்ப்பதற்கு எவ்வித ஆட்சேபணையும் இல்லை. நாங்கள் அதை ஏற்றுக்கொள்கிறோம். ஆனால், கூட்டம் அதிகமாக கூடுகிறது என்பதைக் காரணம் காட்டி, பொதுமக்கள் தாங்களாகவே ஏற்பாடு செய்து கொண்டு கூட்டத்திற்கு வரும் செலவை கூட வேட்பாளர் கணக்கில் சேர்ப்போம் என்று சொன்னால் அது எப்படி நியாயமாகும்?.

ஜனநாயகத்திற்கு எதிரான செயல்

ஒரு மக்களவை தொகுதி என்பது ஒரு மாவட்டத்திற்கு இணையானது. நான் ஒரு மக்களவை தொகுதியில் பிரசாரம் செய்கிறேன், ஒரு கூட்டத்தில் கலந்து கொண்டு பேசுகிறேன் என்றால் என்னை பார்க்க வேண்டும் என்ற ஆர்வத்தில், எனது உரையை கேட்க வேண்டும் என்ற விருப்பத்தில், அந்த தொகுதி முழுவதிலும் இருந்து பொதுமக்கள் தாங்களாகவே வாகனங்களை ஏற்பாடு செய்து கொண்டு அலை கடலென திரண்டு வருகிறார்கள். என்னைப்பார்க்க, எனது உரையை கேட்க வருகின்ற மக்கள் கூட்டத்தை நான் எப்படி கட்டுப்படுத்த முடியும்?. இதை அ.தி.மு.க. நிர்வாகிகள் எப்படி கட்டுப்படுத்துவார்கள்?.

குறிப்பிட்ட எண்ணிக்கையில் தான் மக்கள் வர வேண்டும், அதற்கு மேல் வரக்கூடாது என்று நான் எப்படி சொல்ல முடியும்? எப்படி தடுக்க முடியும்? இது எங்களால் இயலாத காரியம். மக்கள் ஆர்வத்திற்கு அணை போட முடியாது. இவற்றையெல்லாம் புரிந்து கொள்ளாமல் இந்திய தேர்தல் ஆணையம் கட்டுப்பாடுகளை விதிப்பது மக்களுக்கு எதிரான செயல்; ஜனநாயகத்திற்கு எதிரான செயல் என்பதை தெரிவித்துக் கொள்கிறேன்.

மக்களுக்கு விளக்க வேண்டும்

ரத்தின சுருக்கமாக சொல்ல வேண்டும் என்றால், மக்கள் தாங்களாகவே தங்கள் சொந்த செலவில் வாகனங்களில் எனது கூட்டத்திற்கு வரும் செலவு வேட்பாளர் கணக்கில் சேர்க்கப்படும் என்று இந்திய தேர்தல் ஆணையம் அறிவித்துள்ளதால், நான் பேசும் கூட்டத்தில் எனது கட்சியின் வேட்பாளர் கலந்து கொள்ள முடியாத சூழ்நிலை ஏற்பட்டுள்ளது. எங்களது வேட்பாளர் மேடையில் நிற்க முடியாத சூழ்நிலையை, கூட்டத்திற்கு வர முடியாத சூழ்நிலையை, வேட்பாளரின் புகைப்படத்தை கூட ஒட்ட முடியாத சூழ்நிலையை, வேட்பாளர் பெயரை கூட உச்சரிக்க முடியாத சூழ்நிலையை இந்திய தேர்தல் ஆணையம் உருவாக்கி விட்டது.

தமிழ்நாடு தலைமை தேர்தல் அதிகாரி முதலில் இரவு 10 மணிக்கு மேல் வீடு வீடாக சென்று பிரசாரம் செய்யலாம் என்று அறிவித்ததாக செய்தி வந்தது. தற்போது இரவு 10 மணிக்கு பிறகு வீடுகளில் உள்ள வாக்காளர்கள் விரும்பினால் மட்டுமே அவர்களின் வீடுகளுக்கு சென்று வேட்பாளர்கள் தேர்தல் பிரசாரத்தில் ஈடுபட முடியும் என்றும், கதவைத்தட்டி பிரசாரம் செய்தால், பாதிக்கப்பட்டவர்கள் புகார் அளிக்கலாம் என்றும் தெரிவித்துள்ளதாக செய்தி வந்துள்ளது. தேர்தல் ஆணையத்திற்கு ஏன் இவ்வளவு குழப்பம்?. இதுபோன்று, தினம் தினம் புதிய அறிவிப்புகளை தேர்தல் ஆணையம் வெளியிடுவதால் அரசியல்வாதிகள் குழம்பி போயிருக்கிறார்கள். மக்களும் குழம்பி போய் இருக்கிறார்கள். தெளிவான எழுத்துப்பூர்வமான விளக்கத்தை தேர்தல் ஆணையம் அளிக்கலாமே.

மக்கள் விரும்பினால் பிரசாரம் செய்யலாம் என்றும், கதவை தட்டினால் புகார் அளிக்கலாம் என்றும் சொன்னால், அது எப்படி என்று யாருக்கும் புரியவில்லை. வீட்டின் கதவை தட்டிக்கேட்டால் தானே மக்கள் அதை விரும்புகிறார்களா, இல்லையா என்பது தெரியும்? என்னதான் செய்ய வேண்டும் என்பதை தேர்தல் ஆணையம் தான் தெளிவாக மக்களுக்கு விளக்கவேண்டும்.

இவ்வாறு முதல்–அமைச்சர் ஜெயலலிதா பேசினார்.

நன்றி - தி.த

ஊத்துக்கோட்டை வட்டத்தில் முதல்–அமைச்சர் ஜெயலலிதா இன்று பிரசாரம் செய்கிறார்.

திருவள்ளூர் பாராளுமன்ற தொகுதியில் முதல்–அமைச்சர் ஜெயலலிதா இன்று பிரசாரம் செய்கிறார். 

மேடை அமைக்கும் பணி

திருவள்ளூர் (தனி) பாராளுமன்ற தொகுதியின் அ.தி.மு.க. வேட்பாளர் டாக்டர் வேணுகோபாலை ஆதரித்து திருவள்ளூர் மாவட்டம், பெரியபாளையம் அருகே உள்ள வடமதுரையில் தமிழக முதல்–அமைச்சர் ஜெயலலிதா இன்று (செவ்வாய்க்கிழமை) பிரசாரம் செய்ய உள்ளார். அதற்காக 36–க்கு 22 என்ற அளவில் மேடை அமைக்கும் பணி, 300–க்கு 300 என்ற அளவில் ‘ஹெலிபேட்’ அமைக்கும் பணி 30 ஏக்கர் பரப்பளவில் கடந்த 30–ந்தேதி மாலை பூமி பூஜையுடன் தொடங்கியது. அமைச்சர்கள் ஓ.பன்னீர்செல்வம், மாதவரம் மூர்த்தி, ரமணா, அப்துல்ரஹீம், எம்.எல்.ஏ.க்கள் மணிமாறன், பொன்ராஜா, திருவள்ளூர் மாவட்ட ஊராட்சிக்குழு தலைவர் ரவிச்சந்திரன் மற்றும் பலர் இதில் கலந்து கொண்டனர்.

1½ லட்சம் பேர்

பொதுக்கூட்ட நிகழ்ச்சியில் 40 ஆயிரம் பேர் அமர்ந்து பார்க்கக்கூடியவாறும், சுமார் 1½ லட்சம் பேர் பங்கேற்கும் வகையிலும் ஏற்பாடுகள் செய்யப்பட்டு வருகிறது. நுழைவுவாயில் டெல்லி செங்கோட்டை போன்று அமைக்கப்பட்டு வருகிறது. நிகழ்ச்சிக்கான ஏற்பாடுகளை திருவள்ளூர் பாராளுமன்ற தொகுதி தேர்தல் பணிக்குழு செய்துள்ளது..

ஊத்துக்கோட்டையில் தொழில் அதிபர் வீட்டில் நகைகளை கொள்ளையடித்த தையல்காரரை போலீசார் கைது

        காவல்துறைக்கு பொதுமக்கள் பாராட்டு

ஊத்துக்கோட்டையில் தொழில் அதிபர் வீட்டில் நகைகளை கொள்ளையடித்த தையல்காரரை போலீசார் கைது செய்தனர். ஆற்றங்கரையில் புதைத்து வைத்த 25 பவுன் நகைகளையும் பறிமுதல் செய்தனர்.

தொழில் அதிபர் வீட்டில் கொள்ளை

ஊத்துக்கோட்டை, திருவள்ளூர் சாலையை சேர்ந்தவர் சுரேஷ்(வயது 32). தொழில் அதிபர். இவர், கடந்த மாதம் 22–ந் தேதி சிற்றப்பாக்கம் கிராமத்தை சேர்ந்த தனது உறவினர் இறந்து விட்டதால் குடும்பத்துடன் அங்கு சென்று விட்டார். இந்த சந்தர்ப்பத்தை பயன்படுத்தி யாரோ மர்மநபர்கள், சுரேஷ் வீட்டின் பின்பக்க கதவை உடைத்து உள்ளே புகுந்து நகைகளை கொள்ளையடித்து சென்று விட்டனர்.

வீட்டுக்கு திரும்பி வந்த சுரேஷ், வீட்டின் பின்பக்க கதவு உடைக்கப்பட்டு பீரோவில் இருந்த 45 பவுன் நகைகள் கொள்ளையடிக்கப்பட்டு இருப்பதை கண்டு அதிர்ச்சி அடைந்தார். இது குறித்து சுரேஷின் தந்தை கோதண்டன், ஊத்துக்கோட்டை போலீசில் புகார் செய்தார். துணை போலீஸ் சூப்பிரண்டு குமரவேல் உத்தரவின்பேரில் இன்ஸ்பெக்டர் முத்துராமலிங்கம் வழக்கு பதிவு செய்து விசாரணை நடத்தினார். சம்பவ இடத்துக்கு கைரேகை நிபுணர்கள் வரவழைக்கப்பட்டு கொள்ளையர்களின் கைரேகைகளை பதிவு செய்தனர். போலீஸ் மோப்ப நாயும் வரவழைக்கப்பட்டது.

தனிப்படை அமைப்பு

கைரேகை நிபுணர்கள் வீட்டில் உள்ள அனைத்து அறைகளிலும் சோதனை செய்த போது பீரோவின் கீழ் பகுதியில் ஒரு பெட்டி கிடந்தது. அதை திறந்து பார்த்த போது 20 பவுன் நகை இருந்தது. மர்ம நபர்கள் கொள்ளையடித்து செல்லும் அவசரத்தில் அந்த நகை பெட்டியை தவற விட்டு சென்று இருப்பது விசாரணையில் தெரியவந்தது. நகைகளை திருடியவர்களை பிடிக்க இன்ஸ்பெக்டர் முத்துராமலிங்கம் தலைமையில் சப்–இன்ஸ்பெக்டர்கள் நரேஷ், குமார், மனோகர், ஏட்டுகள் கர்ணன், கலையரசன் ஆகியோர் அடங்கிய தனிப்படை அமைக்கப்பட்டது.

தனிப்படை போலீசார் நேற்று அதிகாலை ஊத்துக்கோட்டை நகர எல்லையில் வாகன சோதனையில் ஈடுபட்டனர். அப்போது சந்தேகத்துக்கு இடமான வகையில் நடமாடிக்கொண்டிருந்த வாலிபரை பிடித்து விசாரணை நடத்தினர். அவர் முன்னுக்குப்பின் முரணான தகவல் கொடுத்ததால் அவரிடம் தீவிர விசாரணை நடத்தினர்.

தையல்காரர் கைது

அதில் அவர், ஆந்திர மாநிலம், சித்தூர் மாவட்டம் புத்தூர் அருகே உள்ள பொம்மராஜூபுரம் கிராமத்தை சேர்ந்த சுப்பிரமணி என்பவரது மகன் பிரேம்குமார்(32) என்பது தெரிய வந்தது. பிரேம்குமாருக்கு தையல் வேலை தெரியும். இவர், கொள்ளை நடந்த தொழில் அதிபர் சுரேஷ் வீட்டின் எதிரே உள்ள தையல் கடையில் கடந்த 2 வருடமாக வேலை செய்து வந்தார்.

கொள்ளை சம்பவம் நடந்த நாள் முதல் பிரேம்குமார் வேலைக்கு செல்லாமல் ஊத்துக்கோட்டையில் உள்ள தனது நண்பர்கள் வீட்டில் தங்கி இருந்தார் என்பது விசாரணையில் தெரிந்தது. மேலும் தொழில் அதிபர் வீட்டில் நகைகள் திருடியதையும் பிரேம்குமார் ஒப்புக்கொண்டார். சுரேஷ் குடும்பத்துடன் உறவினர் வீட்டு சாவு நிகழ்ச்சிக்கு செல்வதை அறிந்து கொண்ட பிரேம்குமார் தனது கைவரிசையை காட்டி உள்ளார். இதையடுத்து பிரேம்குமாரை போலீசார் கைது செய்தனர்.

நகைகளை கைப்பற்றினர்

திருடிய நகைகளில் 22 பவுன் நகைகளை பையில் வைத்து ஊத்துக்கோட்டை நகர எல்லையில் உள்ள ஆரணி ஆற்றங்கரையில் மண்ணில் புதைத்து வைத்து உள்ளதாகவும், மீதி உள்ள 3 பவுன் தங்க சங்கிலி திருவள்ளூரில் உள்ள நண்பர் மூலம் ஒரு அடகு கடையில் விற்று செலவு செய்து வந்ததாகவும் அவர் கூறினார்.

இதையடுத்து ஆற்றங்கரையில் புதைத்து வைத்த 22 பவுன் நகைகள் மற்றும் அடகு கடையில் விற்ற 3 பவுன் நகைகளை போலீசார் கைப்பற்றினார்கள். பின்னர் கைதான பிரேம்குமாரை ஊத்துக்கோட்டை கோர்ட்டில் ஆஜர்படுத்தி புழல் ஜெயிலில் அடைத்தனர்.

பிரேம்குமார் ஆந்திராவில் உள்ள புத்தூர், நாகலாபுரம், சத்தியவேடு ஆகிய பகுதிகளில் கொள்ளை சம்பவங்களில் ஈடுபட்டு வந்தார். அவர் மீது போலீஸ் நிலையங்களில் பல்வேறு வழக்குகள் உள்ளது குறிப்பிடத்தக்கது.

தி.த

மக்கள் பாரட்டும் காவல்துறை- பான்பராக் மற்றும் குட்கா பொருட்கள் கடைகளில் விற்பனை செய்ததால் 10 -பேர் கைது

திருவள்ளூர் மாவட்ட போலீஸ் சூப்பிரண்டு சரவணனுக்கு திருவள்ளூர் பஜார் பகுதி மற்றும் சுற்றுவட்டார பகுதிகளில் தமிழக அரசால் தடை செய்யப்பட்ட பான்பராக் மற்றும் குட்கா பொருட்கள் கடைகளில் விற்பனை செய்யப்படுவதாக தொடர்ந்து புகார்கள் வந்தது. 

இதனை தொடர்ந்து போலீஸ் சூப்பிரண்டு உத்தரவின் பேரில் திருவள்ளூர் டவுண் போலீசார் நேற்று முன்தினம் திருவள்ளூர் பஜார், ஜே.என்.சாலை, புங்கத்தூர் ராஜாஜிசாலை, அகரம் தெரு, காந்திநகர், நேதாஜிதெரு, ராஜாஜிசாலை, போன்ற பகுதிகளுக்கு சென்று திடீர் ஆய்வு மேற்கொண்டனர். இந்த ஆய்வின் போது அங்குள்ள கடைகளில் தடை செய்யப்பட்ட பான்பராக், குட்கா பொருட்கள் விற்பனை செய்யப்படுவதை கண்டறிந்து அவற்றை கைப்பற்றினர்.

இது குறித்து திருவள்ளூர் டவுண் போலீசார் வழக்குப்பதிவு செய்து பான்பராக், குட்கா பொருட்களை விற்பனை செய்ததாக திருவள்ளூரை சேர்ந்த பாலாஜி (27), விஜி (24), கோவிந்தன் (56), கோபிநாத் (34), ராஜா (38), ராஜேந்திரன்(42), தெய்வசிகாமணி (66), லோகேஷ்பாபு (28), மணி(21), சவுந்தரபாண்டியன் (65) ஆகிய 10 பேர் மீது வழக்குப்பதிவு செய்து விசாரித்து வருகின்றனர்.

கூனிபாளையம் ஊராட்சிக்கு உட்பட்ட கோட்டைகுளம் கிராமத்தில் மனைவி கண்டித்ததால் கணவர் தூக்குப்போட்டு தற்கொலை

ஊத்துக்கோட்டை,

ஊத்துக்கோட்டை அருகே வேலைக்கு செல்லவில்லை என்று மனைவி கண்டித்ததால் கணவர் தூக்குப்போட்டு தற்கொலை செய்தார்.

தகராறு

ஊத்துக்கோட்டை அருகே உள்ள கூனிபாளையம் ஊராட்சிக்கு உள்பட்ட கோட்டைகுளம் கிராமத்தை சேர்நதவர் வடிவேலு (வயது 35). இவரது மனைவி செஞ்சம்மாள் (30). இவர்களுக்கு 2 மகள்கள் உள்ளனர். செஞ்சம்மாள் வீட்டு வேலைகள் செய்து வருகிறார். வடிவேலு வேலைக்கு செல்லாமல் ஊதாரித்தனமாக ஊர் சுற்றி வந்ததாக தெரிகிறது.

இதை செஞ்சம்மாள் பல முறை கண்டித்தார். ஆனால் வடிவேலு நடவடிக்கையில் எந்தவித மாற்றமும் ஏற்படவில்லை. இது குறித்து நேற்று மாலை கணவன், மனைவிக்கு இடையே கடும் வாக்கு வாதம் ஏற்பட்டது.

தற்கொலை

அதன் பின்னர் செஞ்சம்மாள் அதே கிராமத்தில் உள்ள தனது உறவினர் வீட்டுக்கு சென்று விட்டார். இதனால் வேதனையடைந்த வடிவேலு அருகே உள்ள காட்டுக்கு சென்று அங்குள்ள மரத்தில் தூக்குப்போட்டு தற்கொலை செய்தார்.

இது குறித்து பென்னாலூ£பேட்டை சப் இன்ஸபெக்டர் நரேஷ் வழக்குப்பதிவு செய்து வடிவேலுவின் உடலை கைபற்றி பிரேத பரிசோதனைக்காக திருவள்ளூர் அரசு ஆஸ்பத்திரிக்கு அனுப்பி வைத்து விசாரணை நடத்தி வருகிறார்.

தி.த..

திருவள்ளூர் பாராளுமன்ற தொகுதியில் தே.மு.தி.க., வேட்பாளர் மனுதாக்கல் செய்தார்..

தே.மு.தி.க. வேட்பாளர்

திருவள்ளூர் (தனி) பாராளுமன்ற தொகுதியில் பா.ம.க, தேமுதிக, பாஜக, மாதிமுக, ஆகிய கட்சிகள் பலம் வாய்ந்தவையாக கருதப்படுகிறது..

இதில் பா.ம.க விற்கு தொகுதி முழுவதிலும் செல்வாக்கு கூடுதலாக உள்ளது. அடுத்தப் படியாக தேமுதிக விற்கும் பலம் உள்ளது...

திருவள்ளூர் (தனி) பாராளுமன்ற தொகுதியில் போட்டியிடும் தே.மு.தி.க. வேட்பாளர் வி.யுவராஜ், நேற்று சி.எச்.சேகர் எம்.எல்.ஏ. தலைமையில் திருவள்ளூர் மாவட்ட கலெக்டர் அலுவலகத்திற்கு வருகை தந்து கலெக்டர் வீரராகவராவிடம் வேட்புமனு தாக்கல் செய்தார்.

அப்போது அவருடன் பா.ம.க. மாநில துணை பொதுச்செயலாளர் கோ.ரவிராஜ், பா.ஜ.க. நிர்வாகி ஆர்.எம்.ஆர்.ஜானகிராமன், ம.தி.மு.க. திருவள்ளூர் தொகுதி பொறுப்பாளர் பாபு ஆகியோர் உடன் வந்தனர். வேட்புமனு தாக்கல் செய்வதற்கு முன்னர் தே.மு.தி.க. வேட்பாளர் யுவராஜ்க்கு கட்சி நிர்வாகிகள் திரளானவர்கள் மேளதாளத்துடன் உற்சாக வரவேற்பு அளித்தனர்.

பூண்டியில் சொந்த செலவில் குரங்குகளைப் பராமரித்து வரும் விவசாயி வெங்கடேசன்

சொந்த செலவில் குரங்குகளைப் பராமரித்து வரும் விவசாயி வெங்கடேசன்

மனிதர்களுக்கே ஒரு வேளை உணவளிக்க தயங்கும் மக்கள் மத்தியில் பூண்டியைச் சேர்ந்த விவசாயி ஒருவர், தனது சொந்த செலவில் நூற்றுக்கும் மேற்பட்ட குரங்குகளுக்கு தினமும் உணவளித்து வருகிறார்.

திருவள்ளூரை அடுத்த பூண்டியைச் சேர்ந்தவர் நீலமேகம் என்பவரது மகன் வெங்கடேசன் (35). இவர் விவசாயம் செய்து வருகிறார். இவருக்கு நதியா என்ற மனைவியும், ரேஷ்மா, தருண் என்ற பிள்ளைகளும் உள்ளனர்.

பூண்டி பகுதி ஏரிக்கு மட்டுமல்ல, குரங்குகளுக்கும் பெயர்போன ஊர் ஆகும். பூண்டி அருகே வனப்பகுதி உள்ளதால் இப்பகுதியில் ஏராளமான குரங்குகள் வசித்து வருகின்றன.

காடுகளில் ஏற்பட்டுள்ள வறட்சியின் காரணமாக தமிழகத்தில் பல பகுதிகளிலும் வன விலங்குகள் ஊருக்குள் வருவது அதிகரித்துள்ளது. காட்டில் போதிய உணவும், நீரும் இல்லாததே அவை ஊருக்குள் வர காரணம்.

அதேபோல், பூண்டி அருகே உள்ள வனப்பகுதியிலிருந்து ஏராளமான குரங்குகள் தற்போது உணவு தேடி ஊருக்குள் வருவது அதிகரித்துள்ளது.

"வாடிய பயிரைக் கண்ட போதெல்லாம் வாடினேன்' என்ற வள்ளலாரின் வரிகளுக்கேற்ப, ஒரு நாள் உணவு தேடி வரும் குரங்குகளுக்கு உணவுகள் வழங்கியிருக்கிறார் வெங்கடேசன்.

அதன் பின்னர், அவரைத் தேடி ஏராளமான குரங்குகள் வரத் தொடங்கிவிட்டன. அன்று முதல் அவற்றுக்கு உணவுகள் வாங்கிக் கொடுப்பதை அவர் வழக்கமாக்கிவிட்டார்.

தற்போது அவர் சுமார் நூற்றுக்கும் மேற்பட்ட குரங்குகளுக்கு உணவளித்து வருகிறார்.

வெங்கடேசனுடன் குரங்குகள் மிகவும் அனியோனியமாக பழகி வருகின்றன.

இதனைக் கண்டு பூண்டி பகுதி மக்கள் வியப்பில் ஆழந்துள்ளனர். மேலும் எந்தப் பிரதிபலனும் எதிர்பாராமல் குரங்குகளின் பசியைப் போக்கும் வெங்கடேசனை அவர்கள் பாராட்டியும் வருகின்றனர்.

இதுகுறித்து வெங்கடேசன் கூறியது: நாளுக்கு நாள் நகரங்கள் மட்டுமல்லாமல் கிராமப்புறங்களிலும் மரங்கள் அழிக்கப்பட்டு வீடுகள் கட்டப்படுகின்றன.

முன்பெல்லாம் கிராமங்களில் அதிக அளவில் மரங்கள் வளர்க்கப்படும். வீடுகள்தோறும் வெளியில் உள்ள தொட்டிகளில் தண்ணீர் நிரப்பி வைக்கப்பட்டிருக்கும்.

உணவு மற்றும் தண்ணீருக்காக வரும் குரங்குகள் மரங்களில் உள்ள உணவை தன் தேவைக்கேற்ப உண்டுவிட்டு, வீடுகளின் முன்பு வைக்கப்பட்டுள்ள தண்ணீரை குடித்துவிட்டு யாருக்கும் தொல்லை கொடுக்காமல் சென்றன. ஆனால் தற்போது அந்த சூழ்நிலை இல்லாததால், சாலையில் செல்வோர், தண்ணீர் பிடித்துச் செல்வோர் ஆகியோரை பயமுறுத்தி தன்னுடைய தேவைகளை பூர்த்தி செய்கின்றன.

எனவே என்னால் முடிந்தவரை, கடந்த சில ஆண்டுகளாக இப்பகுதியில் உள்ள குரங்குகளுக்கு பழங்கள், பிஸ்கெட் போன்ற உணவுகளும், தொட்டியில் தண்ணீரையும் வழங்கி வருகிறேன்.

ஆரம்பத்தில் ஒன்று, இரண்டு என வரத் தொடங்கிய குரங்குகள் தற்போது 100 வரை வரத் தொடங்கியுள்ளன.

நான் அவற்றின் உணவு நேரத்துக்கு இங்கு வந்து ஒரு விசில் ஊதுவேன். அதனைக் கேட்டவுடன் இப்பகுதியில் உள்ள குரங்குகள் வந்துவிடும். உணவினை அனைத்து குரங்குகளும் ஒற்றுமையாக உண்டுவிட்டுச் செல்லும்.

குரங்குகளை பராமரிக்க எனக்கு தினமும் ரூ.250 முதல் ரூ.300 வரை செலவாகிறது. இருப்பினும் எனது குடும்பத்தாரும் என்னை ஊக்கப்படுத்துகின்றனர்.

இதனைப் பார்க்கும் மக்கள், தாங்களும் விலங்குகளைப் பராமரிக்க வேண்டும் என்ற எண்ணம் ஏற்பட்டாலே அதுவே எனக்கு திருப்தி என்றார் அவர்.

தார்கலவை கொட்டப்பட்டும் 2 மாதமாக சீரமைக்கப்படாத சாலை

ஊத்துக்கோட்டை, : ஊத்துக்கோட்டை நாகலாபுரம் சாலையில் 13வது வார்டு உள்ளது. இங்கு 300க்கும் மேற்பட்ட குடியிருப்புகள் மற்றும் கடைகள் உள்ளன. இந்த சாலை சென்னை -திருப்பதி செல்லும் முக்கிய சாலையாகும். கடந்த சில மாதங்களுக்கு முன்பு பெரும்பாலான இடங்களில் இச்சாலையில் பள்ளங்கள் ஏற்பட்டது.

இதை சீரமைப்பதற்காக, கடந்த 2 மாதத்திற்கு முன்பு ஊத்துக்கோட்டை காவல் நிலையம் அருகிலும், வணிக வரித்துறை சோதனைச்சாவடி எதிரிலும் தார் கலவைகள் கொட்டப்பட்டது. காவல் நிலையம் அருகே கொட்டப்பட்ட தார்கலவை இறந்தவர்களின் உடலை அடக்கம் செய்வது போல் கொட்டியுள்ளனர். காவல் நிலையத்திற்கு வருகிறவர்கள் தங்களது வாகனங்களை நிறுத்த முடியாமல் அவதிப்படுகின்றனர். அது மட்டுமல்லாமல், வணிகவரித்துறை சோதனை சாவடியில் ஆந்திராவிலிருந்து வரும் கன ரக வாகனங்கள் தங்களது பெர்மிட் புத்தகத்தை கொடுத்து அனுமதி பெற்று தமிழக எல்லைக்கு செல்வார்கள். இதையொட்டி சாலையின் இரு புறமும் கனரக வாகனங்களை நிறுத்துவதால் பெரியபெரிய பள்ளங்கள் ஏற்பட்டுள்ளன. 

இரவு நேரங்களில் இந்த பகுதியில் செல்லும் இரு சக்கர வாகன ஓட்டிகள் பள்ளங்களில் விழுந்து விபத்துக்கள் ஏற்படுகிறது. அதேபோல இரவு நேரங்களில் வாகனங்களில் வருவோர் தார்கலவைகள் மீது மோதி விபத்தில் சிக்குகின்றனர்.  எனவே, சம்பந்தப்பட்ட நெடுஞ்சாலைத்துறையினர் சாலை பள்ளங்களை சரிசெய்வது மட்டுமல்லாமல், சாலை ஓரம் கொட்டி வைத்துள்ள தார்கலவைகளை அகற்ற வேண்டும் என்று கோரிக்கை விடுக்கப்பட்டுள்ளது.

தி.க

கிராமங்களில் தேர்தல் விழிப்புணர்வு பதாகைகள்

ஊத்துக்கோட்டை, : 


தமிழகத்தில் வரும் 24ம்தேதி நாடாளுமன்ற தேர்தல் நடைபெற உள்ளது. தேர்தலில் வாக்காளர்கள் கண்டிப்பாக வாக்களிக்க வேண்டும். வாக்களிப்பது நமது கடமை என மாணவ, மாணவியர்களின் மனித சங்கிலி, பேரணி உள்ளிட்ட பல்வேறு விழிப்புணர்வு நிகழ்ச்சிகள் மூலம் வாக்களிப்பதன் அவசியம் குறித்து பொதுமக்களுக்கு எடுத்து கூறி வருகின்றனர். 

இந்நிலையில், நேற்று தேர்தல் ஆணையத்தின் சார்பில், தேர்தலில் வாக்களிப்பது நமது கடமை. வாக்களித்து ஜனநாயகத்தை காக்க வேண்டும். கையூட்டு பெற்று வாக்களிக்கக் கூடாது. ஓட்டுக்கு பணம் பெற்றால் ஒரு வருடம் சிறை தண்டனை என்று பல்வேறு தேர்தல் விழிப்புணர்வு பதாகைகளும் பிளக்ஸ் போர்டுகளும் திருவள்ளூர் மாவட்ட ஆட்சியர் அலுவலகம் மற்றும் ஊத்துக்கோட்டை, பாலவாக்கம், பெரியபாளையம், கன்னிகைபேர் உள்ளிட்ட  பல பகுதிகளில் வைக்கப்பட்டுள்ளன.

தி.க

வேர்க்கடலை கொள்முதல் விவசாயிகள் கோரிக்கை ஊத்துக்கோட்டை, ஊத்துக்கோட்டை மற்றும் சுற்றியுள்ள பகுதிகளான தாராட்சி, பாலவாக்கம், சூளைமேனி, தண்டலம், பெரியபாளையம், கன்னிகைபேர், போந்தவாக்கம், சீத்தஞ்சேரி உள்ளிட்ட 100க்கும் மேற்பட்ட கிராமங்களில் பெரும்பாலான விவசாயிகள் வேர்க்கடலை பயிர் செய்துள்ளனர்.  கடந்த டிசம்பர் மாதம் விதைத்து மார்ச், ஏப்ரல் மாதத்தில் அறுவடை செய்து விவசாயிகள் விற்பனை செய்கிறார்கள். இதுகுறித்து விசாயிகள் கூறுகையில், வேர்க்கடலை 3 மாத பயிர். இந்த ஆண்டு சரிவர மழை இல்லை. இதனால் ஒரு ஏக்கருக்கு 40 மூட்டை கிடைக்க வேண்டிய வேர்க்கடலை 30 முதல் 35 மூட்டைகள் மட்டுமே கிடைக்கிறது.  மேலும் 40 கிலோ வேர்க்கடலை ரூ.1300க்கு தனியாருக்கு விற்கிறோம்.  அரசாங்கமே இந்த வேர்க்கடலையை கொள்முதல் செய்து ரூ.1400 வழங்க வேண்டும்.  மேலும் இந்த முறை மழை குறைவு என்பதால் வேர்க்கடலை விதைத்த விவசாயிகளுக்கு அரசு நஷ்டஈடு வழங்கவேண்டும் என்றனர்.

உற்பத்தி துவங்கப்பட்ட தனியார் டயர் தொழிற்சாலையில், குடும்பத்தில் ஒருவருக்கு நிரந்தர வேலை கேட்டு, அந்த தொழிற்சாலை முன், கிராம மக்கள் முற்றுகையிட்டனர்.

ஊத்துக்கோட்டை  அடுத்த, தேர்வாய்கண்டிகை கிராமத்தில், 1,200 ஏக்கர் பரப்பளவு கொண்ட, சிப்காட் தொழிற்பூங்காவில், 290 ஏக்கர் பரப்பளவில், பிரான்ஸ் நாட்டைச் சேர்ந்த 'மிஷலின்' டயர் தொழிற்சாலையின் கட்டுமான பணிகள் முடிக்கப்பட்டு சமீபத்தில் உற்பத்தி துவங்கப்பட்டது.

விவசாயம் பாதிப்பு

சிப்காட்டிற்கு நிலம் எடுத்ததன் மூலம், தேர்வாய்கண்டிகை கிராமத்தில் உள்ள, மூன்று ஏரிகள் நீர்வரத்தின்றி விவசாயம் பாதித்ததுடன், தங்களின் வாழ்வாதாரமும் பாதிக்கப்பட்டது என, அப்பகுதி மக்கள் தொடர் குற்றச்சாட்டு வைத்து வருகின்றனர்.

அதன் அடிப்படையில், தேர்வாய்கண்டிகை கிராமத்தைச் சேர்ந்த ஒவ்வொரு குடும்பத்தினருக்கும், ஒரு நிரந்தர வேலை, ஒப்பந்த பணிகள், எரிவாயு இணைப்பு, வீடு கட்டி தருதல் வேண்டும் உள்ளிட்ட கோரிக்கைகளை வலியுறுத்தி, நேற்று காலை, அந்த தொழிற்சாலையின் முகப்பில் அமர்ந்தபடி முற்றுகைஇட்டனர்.

தேர்தலுக்கு பிறகு...

தகவல் அறிந்த, பொன்னேரி ஆர்.டி.ஓ., மேனுவேல்ராஜ், மக்களின் கோரிக்கைகளை கேட்டு, தொழிற்சாலை தரப்பினருடன் கலந்து பேசினார். பின்னர், லோக் சபா தேர்தலுக்கு பின், கிராம மக்களின் கோரிக்கைகள் மீது பேச்சுவார்த்தை நடத்தப்படும் என்றார்.

அதை ஏற்று, கிராம மக்கள், அந்த பேச்சுவார்த்தையில் தொழிற்சாலை சார்பில் பங்கேற்கும் நபர், முடிவு எடுக்க கூடியவராக இருத்தல் வேண்டும், ஊராட்சி நிர்வாகத்திடம் இருந்து தொழிற்சாலை உற்பத்திக்கான தடையில்லா சான்று பெறும் வரை உற்பத்தியை அனுமதிக்க கூடாது என, தெரிவித்தனர். அதை ஆர்.டி.ஓ., ஏற்றுக்கொண்டதன் பேரில், கிராம மக்கள் ஆர்ப்பாட்டத்தை கைவிட்டு கலைந்து சென்றனர்.

தி.ம